काठमाडौं । ट्रम्पको खर्च विधेयक पारित गर्ने प्रयास अमेरिकाको राजनीतिक र सामाजिक क्षेत्र दुबैमा तीव्र विवादको विषय बनेको छ, जहाँ आर्थिक नीति, सामाजिक सुरक्षा र भविष्यको उद्यमशिलताको सन्तुलन खोज्न कठिन भइरहेको देखिन्छ।
अमेरिकी पूर्वराष्ट्रपति डोनाल्ड ट्रम्पले अघि सारेको विवादास्पद खर्च विधेयकमाथि अमेरिकी सिनेटमा बहस सुरु भएको छ। ‘ठूलो, सुन्दर विधेयक’ भनेर प्रचार गरिएको यो प्रस्तावले कर कटौती विस्तार गर्ने, सीमा सुरक्षामा लगानी बढाउनेजस्ता ट्रम्पका प्रमुख प्राथमिकता समेटेको छ, तर सामाजिक सुरक्षा कार्यक्रमहरूमा ठूलो कटौती गर्ने भएकाले राजनीतिक रुपमा निकै विभाजनकारी बनेको छ।
यो विधेयक पारित भएमा ट्रम्पको पहिलो कार्यकालमा गरिएको कर कटौतीलाई ४५ खर्ब डलर खर्च गरेर विस्तार गरिनेछ। तर यसको खर्च जुटाउन मेडिकेडजस्ता कार्यक्रमहरूमा व्यापक कटौती गरिने प्रस्ताव छ, जसले ८६ लाख अमेरिकी नागरिकलाई स्वास्थ्य सेवाबाट वञ्चित गराउन सक्ने अनुमान छ। साथै, यो विधेयकले देशको कुल ऋणमा ३० खर्ब डलरभन्दा बढी थप्ने अनुमान गरिएको छ।
शनिबार राति सिनेटमा प्रारम्भिक बहस सुरु गर्ने प्रस्ताव ५१–४९ को मतले पारित भयो, जसमा दुईजना रिपब्लिकन सांसदले पनि ‘होइन’ भोट दिएका थिए। उपराष्ट्रपति जेडी भान्स आफैंले आफ्नै पार्टीभित्रको मतभेद मिलाउने प्रयास गर्नुपरेको थियो।
डेमोक्रेटहरूले विधेयकको कडा विरोध गरेका छन्। उनीहरूले एक हजार पृष्ठ लामो विधेयक पूरा पढ्न जोड दिँदै बहसलाई ढिलाइ गरेका छन्। डेमोक्रेटिक नेता चक सुमरले भने, “रिपब्लिकनहरूले अमेरिकालाई विधेयकको वास्तविक सामग्री भन्न चाहँदैनन्, त्यसैले हामीले फ्लोरमा सबै पढ्न बाध्य पारिरहेका छौं।”
ट्रम्पले यो विधेयक ४ जुलाई (स्वतन्त्रता दिवस) भित्रै पारित गराउने दबाब आफ्ना सांसदहरूलाई दिइरहेका छन्। तर, रिपब्लिकन पार्टीभित्रकै मतभेदले पारित प्रक्रिया अन्योलमा परेको छ।
एलन मस्कजस्ता ट्रम्पका पूर्वसहयोगीले पनि यो विधेयकको आलोचना गरेका छन्। मस्कले यसलाई 'पूर्णरूपमा पागल र विनाशकारीू' भनेका छन्, र यो प्रस्तावले भविष्यका उद्योगहरूलाई नोक्सान पुर्याएर विगतका उद्योगहरूलाई फाइदा पुर्याउने बताए।
विधेयकले सबैभन्दा धनी अमेरिकीहरूलाई लाभ पुग्ने गरी गरिबवर्गबाट स्रोत स्थानान्तरण गराउने विश्लेषण आएको छ। सर्वेक्षण अनुसार, यो प्रस्ताव अमेरिकाभरका अधिकांश नागरिकबीच अलोकप्रिय देखिएको छ।
