एजेन्सी । अमेरिकाको टेक्सास राज्यमा भीषण वर्षापछिको विनाशकारी बाढीले हालसम्म ५० जनाको ज्यान लिएको पुष्टि भएको छ। लगातारको मूसलधारे वर्षापछि आएको आकस्मिक बाढीले केर काउन्टीको ग्रीष्मकालीन शिविरलगायत क्षेत्रहरूमा ठूलो जनधनको क्षति पुर्याएको छ।
बाढीका कारण हराइरहेका २७ जना बालिकाको खोजी कार्य जारी रहेको उद्धारकर्ताहरूले जनाएका छन्। उद्धारकार्य वायु, स्थल र जल सेना समेत प्रयोग गरेर तीव्र गतिमा चलाइएको छ।
ग्वाडालुप नदीमा बाढीको पानी ४५ मिनेटमै २६ फिट (८ मिटर) ले बढेपछि मध्य टेक्सासका धेरै समुदायलाई आकस्मिक बाढीको चेतावनी जारी गरिएको थियो। सामाजिक सञ्जालमा सार्वजनिक भिडियोहरूमा बाढीले घर, रुख र गाडीहरू बगाएको दृश्य देखिएको छ।
केर काउन्टीका शेरिफ ल्यारी लेइथाका अनुसार त्यहाँ ४३ जनाको शव फेला पारिएको छ। तीमध्ये २८ जना वयस्क र १५ जना बालबालिका छन्। शिविरमा सयौँ मानिस रहेको अवस्थामा आएको बाढीले ठूलो मानवीय क्षति पुर्याएको हो।
टेक्सास डिपार्टमेन्ट अफ इमर्जेन्सी म्यानेजमेन्टका प्रमुख निम किडले उद्धारकार्य जारी रहेको जानकारी दिँदै भने, “बेपत्ता सबै फेला नपरेसम्म खोजी रोकिने छैन।” उनले वायुसेना, नेवी र स्थानीय उद्धारकर्मीहरू सँगसँगै काम गरिरहेको उल्लेख गरे।
टेक्सासका गभर्नर ग्रेग एबोटले राज्यको आपतकालीन घोषणालाई विस्तार गर्दै संघीय स्रोतको लागि राष्ट्रपति डोनाल्ड ट्रम्पसँग अनुरोध गरिरहेका छन्। उपराष्ट्रपति जेडी भान्सले विपत्तिलाई “नबुझिने खालको त्रासदी” भन्दै समवेदना प्रकट गरेका छन्।
राज्य सार्वजनिक सुरक्षा विभागका निर्देशक फ्रिम्यान मार्टिनले यो बाढीलाई ‘सामूहिक हताहतको घटना’ भन्दै लगातारको वर्षाले उद्धारकार्यमा कठिनाइ उत्पन्न गरिरहेको बताए।
राज्यभरका नदी किनार, शिविरस्थल र दर्जनौँ सडक क्षेत्रमा यात्रा नगर्न जनतालाई चेतावनी दिइएको छ।
