काठमाडौं । साताको पहिलो दिन आइतबार शेयर बजार सामान्य उकालो लागेको छ। नेप्से परिसूचक २.४० अंकले बढेर २७०६.३६ विन्दुमा पुगेको छ।
आज विकास बैंक, होटल, जलविद्युत्, बीमा र माइक्रोफाइनान्स बाहेक सबै समूहका शेयर बढेका छन्। अन्य समूह ३ प्रतिशतभन्दा धेरै र फाइनान्स समूह झन्डै २.५ प्रतिशतले उकालो लागेको छ।
नेपाल फाइनान्स कम्पनीको शेयर १० प्रतिशतले बढेको छ। भने गुडविल फाइनान्सको डिबेन्चर र ग्रीन विकास बैंकको शेयर साढे ८ प्रतिशतभन्दा धेरैले घटेका छन्।
नेप्सेमा सामान्य वृद्धि भए पनि कारोबार रकम भने केही घटेको छ। आज ३१८ कम्पनीका २ करोड ७१ लाख कित्ता शेयर किनबेच भई कुल कारोबार ९ अर्ब ५० करोड रुपैयाँको भएको छ, जुन बिहीवारको ९ अर्ब ६४ करोड रुपैयाँभन्दा कम हो।
