काठमाडौँ । भारतका विदेशमन्त्री एस. जयशंकरले मंगलबार बेइजिङमा चिनियाँ राष्ट्रपति सी जिनपिङलाई भेटेका छन् । सामाजिक सञ्जाल प्लेटफर्म एक्समा जयशंकरले आफैँले यस भेटघाटको बारेमा जानकारी दिएका हुन् ।
‘मैले हामी (भारत र चीन)बिचको द्विपक्षीय सम्बन्धमा हालै भइरहेका विकासबारे उहाँ (सी)लाई जानकारी गराएको छु । हामी यस सम्बन्धमा हाम्रा नेताहरूको मार्गदर्शनलाई अत्यन्त महत्त्वपूर्ण ठान्छौँ ।’ पोस्टमा जयशंकरले लेखेका छन् ।
जयशंकर सांघाई सहयोग सङ्गठन एससीओको सम्मेलनमा भाग लिन चीन पुगेका हुन् । यसअघि सोमबार, जयशंकरले चिनियाँ विदेशमन्त्री वाङ यीलाई पनि भेटेका थिए ।
भारत र चीन बिचको द्विपक्षीय सम्बन्धसहित सीमा सम्बन्धी मुद्दाहरूको समाधानको बारेमा छलफल भएको बैठकपछि उनले बताए । पूर्वी लद्दाखमा वास्तविक नियन्त्रण रेखा (एलएसी)मा २०२० मा सैन्य गतिरोध र त्यसपछि दुई देश बिचको सम्बन्धमा तनाव पछि भारतीय विदेशमन्त्रीको यो पहिलो चीन भ्रमण हो ।
