काठमाडौँ । सरकारले आर्थिक वर्ष २०८१/०८२ मा आम्दानीको तुलनामा खर्च बढी गरेको पाइएको छ । महालेखा नियन्त्रकको कार्यालयको तथ्यांक अनुसार गत आर्थिक वर्ष ३ खर्ब ४५ अर्ब बढीले सरकारी खाता नोक्सानीमागएको हो ।
गत आर्थिक वर्ष सरकारले ११ खर्ब ७८ अर्ब ८२ करोड रुपैयाँ बराबर राजस्व संकलन गर्दा १५ खर्ब २३ अर्ब १० करोड खर्च भएको हो ।
राजश्व तर्फ कर र गैरकर शिर्षकमा सरकारले सो बराबर राजस्व संकलन गरेको हो । महालेखको तथ्यांक अनुसार गत वर्ष सरकारले राजस्व शिर्षकमा १० खर्ब ४९ अर्ब ८७ करोड राजस्व संकलन गरेको छ । गैरकर शिर्षकमा १ खर्ब २८ अर्ब ९४ करोड राजस्व संकलन भएको छ ।
आर्थिक वर्ष २०८०/०८१ को तुलनामा गतवर्ष १ खर्ब २० अर्ब बढी राजस्व असुल भएको छ । प्रतिशतका आधारमा ११.३३ प्रतिशत वृद्धि हो । आर्थिक वर्ष २०८०/०८१ मा १० खर्ब ५८ अर्ब राजस्व संकलन भएको थियो ।
आर्थिक वर्ष २०८१/०८२ मा १४ खर्ब १९ अर्ब राजस्व संकलन गर्ने लक्ष्य थियो । अर्ध वार्पिक समीक्षामा संशोधन गरी १२ खर्ब ८६ अर्बको लक्ष्य तय गरिएको थियो । संशोधित लक्ष्य अनुसार ९१.६० प्रतिशत राजस्व संकलन भएको छ ।
अर्थ मन्त्रालय राजस्व महाशाखा प्रमुख उत्तरकुमार खत्रीले विपद, अन्तर्राष्ट्रिय परिस्थितिले गर्दा चुनौतीहरु हुँदाहुँदै पनि अघिल्लो आर्थिक वर्षको तुलनामा उत्साहजनक रुपमा राजस्व संकलन भएको बताए ।
चालू आर्थिक वर्षमा १३ खर्ब १५ अर्ब राजस्व संकलनको लक्ष्य छ । आर्थिक वर्ष २०७१/०७२ मा ४ खर्ब ५ अर्ब, २०७२/०७३ मा ४ खर्ब ८१ अर्ब, ७३/०७४ मा ६ खर्ब ९ अर्ब, २०७४/०७५ मा ७ खर्ब २६ अर्ब, २०७५/०७६ मा ८ खर्ब २९ अर्ब राजस्व संकलन भएको थियो ।
त्यसैगरी २०७६/०७७ मा ७ खर्ब ९३ अर्ब, २०७७/०७८ मा ९ खर्ब ३५ अर्ब, २०७८/०७९ मा १० खर्ब ६६ अर्ब, २०७९/०८० मा ९ खर्ब ५७ अर्ब र ०८०/०८१ मा १० खर्ब ५८ अर्ब रुपैयाँ संकलन भएको थियो ।
खर्चतर्फ सरकारले १५ खर्ब २३ अर्ब १० करोड खर्च गरेको छ । चालु शिर्षकमा सरकारले ९ खर्ब ८० अर्ब खर्च गर्दा विकास खर्चतर्फ २ खर्ब २२ अर्ब खर्च गरेको छ । यस्तै राष्ट्रिय ऋणको सावा ब्याज भुक्तानीका लागि सरकारले ३ खर्ब २० अर्ब रुपैंया खर्च गरेको छ ।
