काठमाडौँ । माथिल्लो भोटेकोसी जलविद्युतले स्थानीयलाई वितरण गर्नुपर्ने भनिएको सेयरको विषयमा विवाद हुँदा स्थानीय आन्दोलित भएका छन् ।
जलविद्युतको सेयर १० प्रतिशत स्थानीयलाई दिने भनिएपनि नदिएको भन्दै आन्दोलित स्थानीयहरूले भोटेकोसी गाउँपालिका कार्यालयमा बिहीबार तोडफोड गरेका छन् ।
जलविद्युत प्रभावित क्षेत्रका एक स्थानीयका अनुसार पालिका अध्यक्ष पासाङ नुर्पु शेर्पाले स्थानीयलाई गुण्डा लगाएर हटाउन खोजेसँगै स्थानीय आक्रोशित भएको बताए ।
स्थानीयहरुले टायरमा आगो बालेर गाउँपालिकामा आगजनी प्रयास समेत गरेका छन् । स्थानीयहरूले जेनजी आन्दोलनको क्रममा १० दिनसम्म पावर हाउस बन्द गरेर विद्युत् उत्पादन रोकेका थिए ।
उत्पादन सुचारु गराउन कम्पनीले हालै गाउँपालिका अध्यक्ष शेर्पासहित जनप्रतिनिधिसँग मात्र छलफल गरेर स्थानीयलाई बाइपास गरेको भन्दै स्थानीय आक्रोशित भएको उनले बताए ।
४६ मेगावाट क्षमताको माथिल्लो भोटेकोसी जलविद्युत आयोजनाबाट करिब दुई दशकअघि विद्युत् उत्पादन सुरु भएपनि स्थानीयलाई प्रतिबद्धता अनुसार सेयर वितरण नभएको भन्दै विवाद हुँदै आएको छ ।
