काठमाडौं । हङकङको ताई पो जिल्लास्थित वाङ फुक कोर्ट हाउसिङ कम्प्लेक्समा बुधबार दिउँसो लागेको ठूलो आगलागीमा कम्तीमा ४४ जनाको मृत्यु भएको छ भने २७९ जना अझै बेपत्ता रहेका छन्। स्थानीय समय अनुसार २:५१ बजे सुरु भएको आगो केही मिनेटमै टावरहरूभर फैलिँदा भवनभित्र सयौँ मानिस रहेका थिए।
अग्निशमन विभागले आगलागीको तीव्रता अत्यधिक भएपछि यसलाई ‘लेभल–फाइभ अलार्म’—हङकङको सबैभन्दा गम्भीर श्रेणी—घोषणा गरेको छ। यस्तो श्रेणीको आगलागी करिब १७ वर्षपछि पहिलोपटक देखिएको अधिकारीहरूले बताएका छन्।
उद्धारका लागि ठूलो संख्यामा फायर–इन्जिन, एम्बुलेन्स र उद्धारकर्मी परिचालन गरिएको थियो। तर धुवाँ, उच्च ताप र अवरुद्ध आपतकालीन मार्गका कारण उद्धार कार्य जटिल बनेको थियो। घाइतेमध्ये ४५ जनाको अवस्था गम्भीर रहेको बताइएको छ।
घटनास्थल वरिपरि निर्माणका क्रममा प्रयोग गरिएका स्क्याफोल्डिङ, प्लास्टिक नेट र अन्य असुरक्षित सामग्रीले आगो छिटो फैलन योगदान गरेको हुनसक्ने प्रारम्भिक अनुमान गरिएको छ। यसैबीच, घटनाको कारणबारे विस्तृत अनुसन्धान सुरु भएको छ।
वाङ फुक कोर्ट वरिपरि अहिले पनि तनावपूर्ण वातावरण रहेको छ। राहत केन्द्रहरूमा पीडित परिवारहरू बेपत्ता आफ्न्तको खोजीमा आँसु झारिरहेका छन्। स्थानीय प्रशासन र उद्धार निकायहरूले मृत्यु संख्या अझै बढ्न सक्ने संकेत गरेका छन्।
