काठमाडौं । युक्रेनले ब्ल्याक सी मा रुसी तेल निर्यातको लाइफलाइनमाथि आधुनिक प्रविधि प्रयोग गरेर ठूलो हमला गरेको छ। युक्रेनी अधिकारीहरूले पुष्टि गरेअनुसार, अत्याधुनिक ‘सी बेबी’ नौसैनिक ड्रोन प्रयोग गरी रुसको ‘छायाँ फ्लीट’सँग सम्बन्धित दुई ठूला तेल ट्याङ्करलाई निशाना बनाइएको हो।
युक्रेनको एसबीयू सुरक्षा सेवा स्रोतलाई उद्धृत गर्दै अन्तर्राष्ट्रिय समाचार संस्थाहरूले जनाएअनुसार, आधुनिकीकरण गरिएको ‘सी बेबी’ ड्रोनहरूले ब्ल्याक सीमा गइरहेका गाम्बियाको झण्डा प्रयोग गरिएका ट्याङ्करहरू काइरोस र विराट लाई सफलतापूर्वक निशाना बनाएका छन्।
भिडियो फुटेजहरूमा मानवरहित समुद्री ड्रोनहरू छालहरू चिर्दै जहाजहरूसम्म पुगेर ठोक्किएपछि ठूलो विस्फोट र आगलागी भएको देखिएको छ।
यो हमला शुक्रबार र शनिबार टर्कीको तट नजिकै भएको हो। रुसले युक्रेनमाथि जारी युद्धलाई निरन्तरता दिनका लागि तेल निर्यातबाट प्राप्त हुने आम्दानीमाथि निर्भर रहँदै आएको छ। युक्रेनले ‘सी बेबी’ ड्रोनमार्फत गरेको यो प्रहारलाई रुसको प्रमुख वित्तीय स्रोतमाथि दबाब दिने रणनीतिका रूपमा हेरिएको छ।
ट्याङ्करहरूले संकटकालीन कल गर्दै मानवरहित समुद्री ड्रोनबाट हमला भएको सूचना दिएका थिए। हमला गरिएका ट्याङ्करहरू पश्चिमी प्रतिबन्धहरूलाई छल्न प्रयोग गरिने ‘छायाँ फ्लीट’ का हिस्सा हुन्, जसमा प्रायः पुरानो स्वामित्व र बीमा अस्पष्ट भएका जहाजहरू प्रयोग हुने गर्छन्।
टर्कीको यातायात मन्त्रालयले दुई पटकको हमलापछि पनि जहाजमा सामान्य क्षति मात्र भएको र चालक दलका सदस्यहरू सकुशल रहेको जानकारी दिएको छ। यद्यपि, यो घटना युक्रेनले सामुद्रिक युद्धमा आफ्नो क्षमता लगातार बढाइरहेको स्पष्ट सङ्केत हो।
