काठमाडौँ । नेपाली कांग्रेसको आधिकारिकता सम्बन्धी विवादमा सर्वोच्च अदालतमा आज पेसी तोकिएको छ । उक्त मुद्दा आजको सूचीको १२औँ नम्बरमा परेको छ।
यसअघि चैत १ गते पनि पेसी तोकिए पनि पालो नआएकाले सुनुवाइ स्थगित भएको थियो ।
त्यतिबेला रिट निवेदक तथा पूर्व उपसभापति पूर्ण बहादुर खड्का बहसका लागि अदालत पुगेका थिए ।
आज भने दुवै पक्षका कांग्रेस नेताहरू अदालतमा उपस्थित हुने भएका छन् ।
उपसभापति विश्वप्रकाश शर्मा पनि बहसका लागि सर्वोच्च अदालत जाने कार्यक्रम छ ।
विशेष महाधिवेशनबाट गगन थापा सभापतिमा निर्वाचित भएपछि र निर्वाचन आयोगले त्यसलाई मान्यता दिएपछि, उक्त निर्णयविरुद्ध खड्काले सभापति थापा, उपसभापति शर्मा र निर्वाचन आयोगलाई विपक्षी बनाउँदै रिट दायर गरेका हुन् ।
