काठमाडौँ । प्रतिनिधिसभा अन्तर्गतका विषयगत समितिहरूको सभापति चयन प्रक्रिया औपचारिक रूपमा सुरु भएको छ । शुक्रबार हुने निर्वाचनका लागि आज बिहीबार उम्मेदवारी दर्ता गरिँदैछ ।
सङ्घीय संसद् सचिवालयले यसअघि नै सार्वजनिक गरेको निर्वाचन कार्यक्रमअनुसार, आज अपराह्न १ बजेदेखि ४ बजेसम्म सम्बन्धित समितिको कुनै सदस्यलाई सभापतिमा निर्वाचित गरियोस् भन्ने प्रस्ताव दर्ता गर्न सकिनेछ ।
संसदीय समितिहरूलाई ‘मिनी संसद्’का रूपमा समेत लिइने भएकाले सभापति चयनलाई महत्वपूर्ण राजनीतिक घटनाका रूपमा हेरिएको छ । समितिका सदस्यहरू यसअघि नै मनोनीत भइसकेकाले तीमध्येबाट सभापति चयन गरिनेछ ।
संसद्मा राष्ट्रिय स्वतन्त्र पार्टी (रास्वपा) को बहुमत रहेकाले मतदानको अवस्था आएमा अधिकांश समितिको सभापति रास्वपाले जित्ने आकलन गरिएको छ । रास्वपा नेताहरूका अनुसार पार्टीले १२ मध्ये ११ वटा समितिको सभापति आफैँ राख्ने तयारी गरेको छ भने लेखा समिति विपक्षीलाई दिने सम्भावना रहेको छ ।
उता विपक्षी दलहरू भने साझा धारणा बनाउन आन्तरिक छलफलमा जुटेका छन् । नेकपा एमालेका सांसद तथा उपाध्यक्ष गुरु बरालले विपक्षी तीन दलबीच बैठक बस्ने जानकारी दिँदै कुन–कुन समितिमा उम्मेदवारी दिने भन्ने विषयमा छलफलपछि टुङ्गो लाग्ने बताए ।
नेपाली कांग्रेसका सांसद भीष्म आङदाम्बेले पनि विपक्षीको साझा उम्मेदवार तय गर्ने प्रयास भइरहेको उल्लेख गर्दै आज दिउँसो हुने बैठकपछि उम्मेदवारीबारे निर्णय हुने बताए ।
यता रास्वपाले पनि सभापति चयनबारे रणनीति तय गर्न आजै संसदीय दलको बैठक बोलाएको छ । पार्टीका महामन्त्री कवीन्द्र बुर्लाकोटीका अनुसार समितिको नेतृत्व कसरी बाँडफाँट गर्ने भन्ने विषयमा बैठकमा छलफल हुनेछ ।
प्रतिनिधिसभा अन्तर्गत १२ वटा (दुई संयुक्तसहित) संसदीय समितिका सभापति चयन हुन लागेका छन् । यस प्रक्रियाले आगामी दिनमा संसद्को कामकारबाही र शक्ति सन्तुलनमा महत्वपूर्ण प्रभाव पार्ने अपेक्षा गरिएको छ ।
