काठमाडौँ । रसुवाको भोटेकोशी बाढीमा परी ज्यान गुमाएका नेपाल प्रहरीका कर्मचारीले नेपाल प्रहरी कल्याण कोषबाट लिएको विशेष ऋण मिनाहा हुने भएको छ । साथै, मृतक प्रहरीका परिवारलाई जनही १० लाख रुपैयाँ आर्थिक सहायता उपलब्ध गराउने निर्णय गरिएको नेपाल प्रहरीले जनाएको छ ।
नेपाल प्रहरी प्रधान कार्यालयका अनुसार मृतक प्रहरीका परिवारका इच्छुक सदस्यलाई सीपमूलक तालिम तथा रोजगारीको अवसर उपलब्ध गराउने निर्णयसमेत भएको छ ।
त्यस्तै, मृतक प्रहरीका सन्तानलाई प्रहरी स्कुलमा अध्ययनका लागि शैक्षिक शुल्क मिनाहा गरी आवश्यक शैक्षिक व्यवस्था मिलाइने भएको छ ।
नेपाल प्रहरीका महानिरीक्षक दानबहादुर कार्कीको अध्यक्षतामा बसेको बैठकले मृतक प्रहरीका परिवारलाई राहत तथा संरक्षण प्रदान गर्ने उद्देश्यले ऋण मिनाहा, आर्थिक सहायता, रोजगारी र शिक्षासम्बन्धी विभिन्न निर्णय गरेको हो ।
नेपाल प्रहरीका अनुसार रसुवाको बाढीमा परी हालसम्म २५ जना प्रहरी सम्पर्कविहीन छन् भने तीन जना प्रहरीको सनाखत भइसकेको छ ।
