काठमाडौँ । नेपाली कांग्रेस र नेकपा एमाले गठबन्धनलाई जनता समाजवादी (जसपा) र राष्ट्रिय प्रजातन्त्र पार्टी (राप्रपा) ले समर्थन गर्ने भएका छन् । संविधान संशोधनको एजेण्डासहित निर्माण भएको उक्त गठबन्धनलाई दुई साना दलले समर्थन गर्ने भएका हुन् ।
जसपा र राप्रपाको मंगलबार बिहान बसेको सचिवालय बैठकले उक्त निर्णय गरेको हो । राप्रपाका अध्यक्ष राजेन्द्र लिङ्देनले संविधान सुधार गर्नेतर्फ अब बन्ने सरकार अघि बढे आफूहरूले विचार गर्ने बताए ।
यस्तै, नयाँ गठबन्धनलाई जनता समाजवादी पार्टीले साथ दिने भएको छ । सोमबार मध्यरातमा भएको उक्त सहमतिलाई जसपा नेपालका अध्यक्ष उपेन्द्र यादवले साथ दिने बताएका हुन् ।
उनले तत्काल आफ्नो पार्टीले सरकारमा जाने नजाने भन्दा पनि नयाँ समीकरणलाई साथ दिने निर्णय भएको बताए ।
माओवादी–एमाले गठबन्धनको पालामा जसपा नेपाल विभाजन भएको थियो । माओवादीका अध्यक्ष एवं प्रधानमन्त्री प्रचण्डले जसपा नेपाल आफूले फुटाएको भनी अभिव्यक्ति दिएका थिए ।
