काठमाडौँ । प्रधानमन्त्री प पुष्पकमल दाहाल ‘प्रचण्ड’ को सरकारमा सहभागि राष्ट्रिय स्वतन्त्र पार्टी (रास्वपा) का चारै मन्त्रीले राजीनामा दिने भएका छन् ।
उनीहरुले प्रधानमन्त्री प्रचण्डलाई बिहीबार बिहान संयुक्त रुपमा राजीनामा पत्र बुझाउन लागेको रास्वपाका प्रमुख सचेतक सन्तोष परियारले जानकारी दिए ।
‘हिजो नै राजीनामा दिने सोचेका थियौं तर पार्टी बैठकले सम्भव भएन । अहिले बिहान ८ बजे प्रधानमन्त्रीलाई राजीनामा बुझाउने तयारी छ’, परियारले भने ।
प्रचण्ड नेतृृत्वको सरकारमा रास्वपाका सभापति रवि लामिछाने उपप्रधानमन्त्री तथा गृहमन्त्री छन् । यसैगरी उपसभापति डोलप्रसाद अर्याल श्रम तथा रोजगार मन्त्री, सुमना श्रेष्ठ शिक्षा मन्त्री र विराजभक्त श्रेष्ठ युवा तथा खेलकुद मन्त्री छन् ।
बुधबार नेकपा एमालेले सरकारलाई दिएको समर्थन फिर्ता लिनुका साथै मन्त्रीहरुले पनि सामूहिक राजीनामा बुझाएका थिए ।
नेकपा एमालेले नेकपा माओवादी केन्द्रसँगको सत्ता समीकरण तोडेर नेपाली कांग्रेससँग गठबन्धन गरेपछि सरकार अल्पमतमा परेको छ । प्रचण्ड नेतृत्वको सरकार ढल्ने निश्चित भएपछि रास्वपाका मन्त्रीहरुले पनि सरकार छाड्न लागेका हुन् ।
