काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज बस्ने भएको छ । पार्टी केन्द्रीय कार्यालय बालाजुमा मंगलबार बिहान ८ बजे केन्द्रीय समितिको बैठक बस्न लागेको हो ।
आजको बैठकमा निलम्बित महामन्त्री डा.मुकुल ढकालमाथिको कारबाहीबारे निर्णय हुने भएको छ । पार्टीको विधानले कारबाहीसम्बन्धी निर्णय लिन केन्द्रीय समितिको बैठक अनिवार्य गरेको छ ।
ढकालमाथि छानबिन गरी अनुशासन आयोगले प्रतिवेदन तयार पारिसकेको छ । उक्त प्रतिवेदन अनुशासन आयोगका प्रमुख डा भरत देवकोटाले सभापति रवि लामिछानेलाई बुझाइसकेका छन् ।
प्रतिवेदनबारे आइतबार राति बसेको सचिवालय बैठकमा प्रारम्भिक छलफल भएको थियो । उक्त बैठकमा महामन्त्री ढकाललाई गर्न सकिने कारबाहीबारे पनि लगभग टुंगो लागिसकेको रास्वपा स्रोतले जनाएको छ ।
गत मंगलबार बसेको केन्द्रीय समिति बैठकले ढकाललाई ७ दिनका लागि निलम्बन गरी आवश्यक छानबिनका लागि अनुशासन आयोगलाई जिम्मा दिएको थियो । उक्त अवधि पनि आज सकिँदै छ ।
