काठमाडौं । नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ सोमबार प्रधानमन्त्री केपी शर्माको गृहजिल्ला झापा पुगेका छन् । ओलीको निर्वाचन क्षेत्र झापा–५ को गौरीगञ्ज पुगेर उनले गिरिबन्धु टी–इस्टेटमा भएको बदमासी पर्दाफास गरेरै छाड्ने बताएका छन्।
नेकपा माओवादी केन्द्रले गौरीगञ्ज गाउँपालिका वडा नं ३ मा आयोजना गरेको दोस्रो गाउँ सम्मेलनलाई सम्बोधन गर्दै अध्यक्ष दाहालले गिरिबन्धु, ओम्नी, नक्कली भुटानी शरणार्थी प्रकरणको पर्दाफास गरेर छाड्ने बताए ।
भ्रष्टाचारीहरू धमाधम पक्राउ पर्न थालेपछि कांग्रेस–एमालेको निदहराम भएर नयाँ गठबन्धन बनेको उनको दाबी छ । ‘गिरिबन्धुको कुरा उठेपछि एमालेको हेडक्वार्टर तानिने अवस्था आयो। बेचन झा पक्राउ परेपछि सुई अर्कातिर सोझियो,’’ उनले भने, ‘अनि रातारात गठबन्धन तोडियो र अप्राकृतिक गठबन्धन बन्यो।’’
