काठमाडौँ । संसद्को सबैभन्दा ठूलो दल कांग्रेसको समर्थनमा एमाले अध्यक्ष केपी ओलीले राष्ट्रपतिसमक्ष प्रधानमन्त्री नियुक्तिका लागि शुक्रबार दाबी पेस गरेका छन् ।
राष्ट्रपति रामचन्द्र पौडेलले संविधानको धारा ७६ (२) अनुसार प्रधानमन्त्रीमा दाबी पेस गर्न आह्वान गरेलगत्तै राति ९ बजे दुई दलका नेताहरू शीतलनिवास पुगेर दाबी पेस गरेका हुन् ।
दिउँसो बसेको प्रतिनिधिसभा बैठकमा प्रधानमन्त्री पुष्पकमल दाहाल प्रचण्ड विश्वासको मत नपाएपछि पदमुक्त भएसँगै नयाँ सरकार गठनका लागि बाटो खुलेको हो ।
राष्ट्रपति कार्यालयले नयाँ सरकार गठन नभएसम्मका लागि उनलाई कामचलाउ प्रधानमन्त्रीको जिम्मेवारी तोकेको छ ।
प्रधानमन्त्रीको शपथ र नियुत्ती आइतबार
ओलीसँगै कांग्रेस सभापति शेरबहादुर देउवा, दुवै दलका प्रमुख सचेतकसहितका नेताहरू दाबी पेस गर्न शीतलनिवास पुगेका थिए । दाबीपत्रमा देउवा र ओलीको हस्ताक्षर छ । उनलाई आइतबार प्रधानमन्त्रीमा नियुक्त गरी शपथ गराउने राष्ट्रपति कार्यालयको तयारी छ ।
एमाले प्रमुख सचेतक महेश बर्तौलाले आइतबारै नियुक्ति गर्ने गरी राष्ट्रपति कार्यालयले तयारी गरेको बताए ।
