काठमाडौँ । सरकारले माग सम्बोधन नगरेको भन्दै ग्यास उद्योगीहरु आन्दोलित भएका छन् । बिहीबार ललितपुरमा पत्रकार सम्मेलनको आयोजना गर्दै नेपाल एलपी ग्यास उद्योग संघले माग सम्बोधन नभए बिक्री वितरण नै ठप्प पार्ने बताएको हो ।
संघले सार्वजनिक गरेको १९ बुँदे मागमा सरकारले लगानीको सरक्षणको गर्नुपर्नेमा निरुत्साहित गरेको देखि विस्फोटन ऐन कानून बनाउनुपर्नेसम्मका माग समेटिएका छन् ।
संघका अध्यक्ष शिव प्रसाद घिमिरेले नेपाल आयाल निगमले व्यवसायीको माग सम्बोधन नगरे बाध्य भएर आन्दोलन गर्न बाध्य हुनुपर्ने बताए ।
उनका अनुसार संघले माघ ३० गते बुधवारदेखि देशभरका ५९ वटै एलपी ग्यास उद्योगहरूले नेपाल आयल निगम बाट प्रोडक्ट डेलिभरी अडर (पीडीओ) खरिद रोक्नेछ ।
यस्तै, फाल्गुण १ गते बिहिबार देखि २०८१ फाल्गुण ५ गते सोमवारसम्म सबै ग्याँस उद्योगहरूले बिरोधका कार्यक्रमहरूबारे स्थानीय सबै संघ संस्था सञ्चार माध्यमहरूमार्फत र केन्द्रमा नेपाल एलपी ग्यास उद्योग संघले प्रचारप्रसार गर्ने, फाल्गुण ६ गते मंगलवारदेखि भारतको इण्डियन आयलका नेपालका लागि लोड हुने एलपी ग्याँसको ग्याँस बुलेट कुनै पनि लोड नगर्ने नगराउने १९ बुदेँ मागमा उल्लेख छ ।
फाल्गुण १२ गते सोमवारदेखि नेपालका लागि लोड भएर आयका कुनै पनि ग्यास बुलेटहरू कुनैपनि भन्सार नाकाबाट नछुटाउने संघले चेतावनी दिएको छ ।
अध्यक्ष घिमिरेले फागुन १८ गते आइतवारदेखि सबै नेपालका ५९ उद्योगहरू जायज मागहरू सम्बोधन नभएमा अनिश्चितकालिन बन्द गर्ने घोषणा गरे । उनले फाल्गुण २२ गते शनिवारदेखि देश भरका ग्यास विक्रेता डिपोहरूले सम्पूर्ण बन्द गरिदिन अनुरोध गर्ने बताए ।
उनले नेपाल सरकारले ग्यास प्रयोगको सुरक्षासम्बन्धी जनचेतना कार्यक्रम प्रभावकारी रूपमा सञ्चालन गर्नुपर्ने माग गर्दै एलपी ग्यास दुर्घटना रोक्न, कमसल पाइप तथा रेगुलेटर प्रयोगमा कडाइ गर्न, र सुरक्षासम्बन्धी नियम पालना गराउन कानूनी व्यवस्था लागू गरिनुपर्ने माग राखे ।
विगत ६ वर्ष देखि डिलर कमिसन, ढुवानी, ओभरहेड खर्च वृद्धि नभएकोले तत्कालै वृद्धि हुनुपर्ने र हरेक वर्ष मुद्रास्फिती दरअनुसार समायोजन गर्ने व्यवस्था गर्नुपर्ने माग गरेको छ ।
