काठमाडौं । न्युयोर्क सहरको प्रसिद्ध हडसन नदीमा बिहीबार एक हेलिकप्टर खस्दा हेलिकप्टरमा सवार सबै ६ जनाको मृत्यु भएको छ। मृतकमध्ये पाँच जना एउटै परिवारका स्पेनी पर्यटक थिए भने एक जना पाइलट रहेको पुष्टि गरिएको छ।
न्युयोर्कका मेयर एरिक एडम्सले पत्रकार सम्मेलनमार्फत घटनाको पुष्टि गर्दै मृतकमध्ये तीन जना बालबालिका रहेको जानकारी दिएका छन्। 'यो अत्यन्तै दुःखद दुर्घटना हो,' मेयर एडम्सले भने, 'पीडितको परिवारलाई समवेदना प्रकट गर्दछु।'
दुर्घटनाको कारणबारे अनुसन्धान जारी रहेको प्रहरीले जनाएको छ। न्युयोर्क प्रहरी विभागकी आयुक्त जेसिका टिशका अनुसार प्रारम्भिक अध्ययनबाट हेलिकप्टर आकस्मिक रूपमा नियन्त्रण गुमाएर नदीमा खसेको देखिन्छ। दुर्घटनाको एक भिडियो फुटेजमा हेलिकप्टर आकाशबाट उल्टो अवस्थामा झरेको देखिन्छ।
हेलिकप्टर डाउनटाउन स्काइपोर्टबाट उडेको केही समयमै दुर्घटनामा परेको हो। उद्धार टोली तत्कालै घटनास्थलमा पुगे पनि सबै सवार व्यक्तिको ज्यान गइसकेको थियो। प्रहरीका अनुसार मृतकको परिवारलाई औपचारिक जानकारी नदिइएसम्म नाम सार्वजनिक गरिने छैन।
