काठमाडौँ । बार्सिलोनाले ला लिगामा आइतबार राति मोंतजुइक रंगशालामा ऐतिहासिक पुनरागमन गर्दै रियल मड्रिडलाई ४–३ गोल अन्तरले पराजित गरेको छ।
खेलको शुरूआतमै बार्सिलोनाका लागि सबैभन्दा खराब अवस्था देखिएको थियो। तेस्रो मिनेटमै गोलकिपर वोइचेक स्जेस्नीले किलियन एमबाप्पेलाई फाउल गरेपछि पेनाल्टी प्रदान गरियो र एमबाप्पेले सजिलै गोल गर्दै रियल मड्रिडलाई १–० को अग्रता दिलाए। त्यसपछि १४औं मिनेटमा लामिन यामालले फाउलमा परेको दाबी गरे पनि रेफ्रीले खेल जारी राखे, र मड्रिडले फेरि एमबाप्पेबाटै गोल गर्दै २–० को अग्रता बनायो।
तर, त्यसपछि भने बार्सिलोनाले अविश्वसनीय पुनरागमन गर्यो। १९औं मिनेटमा एरिक गार्सियाले कर्नरबाट हेड गर्दै गोल गरे, त्यसपछि १७ वर्षीय यामालले कर्लिङ प्रहारमा बराबरी गोल गर्दै खेल फर्काए।
त्यसपछि बार्सिलोनाका ब्राजिली खेलाडी राफिन्हाले खेलको जिम्मा सम्हाले। उनले पहिलो हाफमै दुई गोल थप्दै बार्सिलोनालाई ४–२ को अग्रता दिलाए। पहिलो गोलमा उनी डी बक्सको बाँया छेउबाट स्पेस पाएर फिनिस गरे भने दोस्रोमा रियल डिफेन्डर लुकास भास्केजको गल्तीको फाइदा उठाउँदै गोल थपे।
दोस्रो हाफ तुलनात्मक रूपमा कम नाटकीय रह्यो। राफिन्हाले यामाललाई पास दिएका थिए, जसले बल पोस्टमा पठाए तर भीएआरले राफिन्हालाई अफसाइड देखाउँदै गोल खारेज गर्यो।
७०औँ मिनेटतिर रियल मड्रिडले पुनः फर्कने संकेत देखायो। छिटो काउन्टर अट्याकमा भिनिसियस जुनियरको पासमा एमबाप्पेले आफ्नो ह्याट्रिक पूरा गरे र अन्तर ४–३ मा झारे। यस ह्याट्रिकसँगै उनले यस सिजन ला लिगामा आफ्नो गोल संख्या ३९ पुर्याएका छन्, जुन रियल मड्रिड खेलाडीका लागि शुरूआती सिजनमै हालसम्मकै उच्चतम हो।
यता, राफिन्हा पनि ह्याट्रिक नजिक पुगेका थिए। यामालले दिएको आकर्षक क्रसमा उनले गोलपोस्ट चुकाए। फेरान टोरेसको प्रहार ओरिलियन चुओमेनीको हातमा लागेपछि पेनाल्टीको माग गरिए पनि भीएआर जाँचपछि पेनाल्टी दिइएन।
अन्तिम मिनेटमा रियल मड्रिडले केही अवसर गुमायो। विकल्प भिक्टर मुनेजले पोस्ट अगाडि पुगेर पनि बल बाहिर हाने, एमबाप्पेको प्रहार स्जेस्नीले बचाए र अर्को गोल अफसाइडमा परेको भन्दै मान्यता दिइएन।
यस सिजन ‘क्लासिको’मा चौथो जितसँगै बार्सिलोनाले सन् १९८२–८३ को एकै सिजनमा चारपल्ट रियललाई हराउने कीर्तिमान बराबरी गर्यो।
जितसँगै बार्सिलोना तालिकाको शीर्ष स्थानमा रहँदै रियल मड्रिडभन्दा सात अंकले अगाडि पुगेको छ। अब बाँकी तीन खेलमध्ये एक जित अथवा रियलको एक हारले बार्सिलोनालाई लिग उपाधि दिलाउनेछ।
बार्सिलोनाको अब बिहीबार एस्पान्योललाई हराए वा बुधबार रियल मड्रिड मल्लोर्कासँग हार खाए बार्सिलोनाले उपाधि रक्षा गर्नेछ ।
यस सिजन बार्सिलोनाले क्लासिकोमा रियल मड्रिडलाई चारपटक हराउँदै सन् १९८२–८३ को कीर्तिमान बराबरी गरेको छ।
