काठमाडौँ । नेपाल दूरसञ्चार प्राधिकरणले दूरसञ्चार सेवा प्रदायक कम्पनीको साइबर सेक्युरिटी अडिटिका लागि ३ कम्पनी छनोट गरेको छ । प्राधिकरणले आर्थिक वर्ष २०८०/८१ का लागि दूरसञ्चार सेवाप्रदायकहरूको साइबर सेक्युरिटी अडिटिङ आईएस (सूचना सुरक्षा) तथा क्लाउड अडिटरको सूची सार्वजनिक गरेको हो ।
प्राधिकरणले सार्वजनिक गरेको आईएस तथा क्लाउड दुवै अडिटिङका लागि बिज सर्भ आईटी प्रालि, सिनिकल टेक्नोलजी प्रालि र एमिनेन्स वेज प्रालि छनोट भएका छन् । यी तीनै अडिटर नेपालकै साइबर सुरक्षा कम्पनी हुन् ।
प्राधिकरणले जारी गरेको साइबर सुरक्षा विनियमावली २०७७ अनुसार प्राधिकरणबाट अनुमतिपत्र प्राप्त हरेक सेवाप्रदायकले हरेक आर्थिक वर्ष बाहिरको अर्थात् सरकारले तोकेको आईएस (सूचना सुरक्षा) अडिटर तथा क्लाउड अडिटरबाट अडिट गराउनुपर्ने प्रावधान छ ।
सोही अनुरूप प्राधिकरणले आर्थिक वर्ष २०८०/८१ का लागि राष्ट्रिय तथा अन्तर्राष्ट्रिय दुवै कम्पनीमध्येबाट साइबर सेक्युरिटी अडिटरको रोस्टर सार्वजनिक गरेको हो ।
