काठमाडौँ । संघीय मामिला तथा सामान्य प्रशासनमन्त्री राजकुमार गुप्ताले मालपोतका कर्मचारी सरुवाका लागि घुसको डिल गरेको अडियोमा रञ्जिता श्रेष्ठ समेत मुछिएकी छिन् ।
पोखरा मालपोतका तत्कालीन प्रमुख तथा भूमि आयोग अध्यक्ष नियुक्तिमा घुस डिल भएको अडियोमा सुनिएको महिलाको आवाज पूर्वमन्त्री समेत रहेकी नागरिक उन्मुक्ति पार्टीकी नेतृ रञ्जिता श्रेष्ठ रहेको खुलेको हो ।
मन्त्री गुप्ताले भूमिमन्त्री बलराम अधिकारीलाई पोलीरहँदा सोही अडियोमा सुनिएको महिलाको आवाज उनै श्रेष्ठको रहेको पाइएको हो । उनले आफू सो स्थानमा रहेको स्वीकार गरे पनि घुस लेनदेनमा आफू संलग्न नरहेको दावी गरेकी छन् ।
राजीनामा नदिए बर्खास्तीको तयारी
बहालवाला मन्त्रीकै घुसको अडियो सार्वजनिक भएपछि सत्तारुढ दलमा हलचल मैचिएको छ । आइतबार बसेको प्रतिनिधिसभाको बैठमा विपक्षी दलले प्रधानमन्त्री केपीशर्मा ओलीले यो विषयमा जवाफ दिनुपर्ने माग भैरहँदा ओलीले उनलाई बर्खास्तीको तयारी गरेको पाइएको हो ।
नेकपा एमालेको कोटाबाट मन्त्री भएका व्यक्तिले नियुक्ती र कर्मचारी हटाउन विचौलीयासँग ७८ लाख घुस मागेको अडियो सार्वजनिक भएसँगै उनले राजीनामा नदिए हटाउने तयारी गरिएको हो ।
सामान्य प्रशासनमन्त्री गुप्तालाई हटाउने तयारी भइरहँदा सोही प्रकरणमा मुछिएका भूमिसुधार तथा सहकारीमन्त्री बलराम अधिकारीलाई भने जोगाउने तयारी गरिएको छ ।
घुस लिएको कुराको प्रमाण नै अख्तियार दुरुपयोग अनुसन्धान आयोगमा पुगेपछि प्रधानमन्त्री केपी ओलीले बाध्य भएर गुप्तालाई राजीनामा गराउने तयारी रहेको स्रोतको भनाई छ ।
स्रोतका अनुसार गुप्तालाई सकेसम्म राजीनामा गराउने, नभए बर्खास्त गराउने तयारी भए पनि भूमि व्यवस्था, सहकारी तथा गरिबी निवारणमन्त्री अधिकारीलाई भने यही आरोपकै आधारमा तत्काल कुनै निर्णय नलिने सम्भावना छ । ‘बलरामले पैसा खाइसक्यो’ भने पनि त्यसको तथ्य प्रमाण नभएकोले मन्त्री अधिकारीलाई हटाउनु अन्याय हुने सत्ताधारी पक्षको तर्क छ ।
अडियोलाई आधार मान्दा भूमि आयोगको जिल्ला अध्यक्ष जस्तो राजनीतिक नियुक्तिमा मात्र नभएर मालपोत कार्यालय कास्कीका प्रमुख सरुवामा पनि डिल भएको छ । मापालपोत कार्यालय प्रमुख सरुवामा ५३ लाख घुसको डिल भएको छ ।
यो घुस प्रकरणको प्रमाण तीन साताअघि नै अख्तियार पुगिसक्दा पनि कारवाही प्रक्रिया अघि बढाउन रोक्नुले प्रधानमन्त्री ओली प्रति नै आशंका जन्माएको छ । उनले आफू भ्रष्टाचार नगर्ने र गर्न नदिने तर्क गर्दै आएका थिए ।
