काठमाडौँ । सोमबार साँझ प्रधानमन्त्री निवास बालुवाटारमा बसेको कांग्रेस, एमाले र जसपा नेपालबीचको बैठकमा प्रधानमन्त्री केपी शर्मा ओलीले जसपा नेपाललाई पनि सहरकारमा सहभागी हुन आग्रह गरे ।
कांग्रेस एमालेको संयुक्त सरकारलाई समर्थन गरेतापनि सरकारमा सहभागी नभएको उपेन्द्र यादव नेतृत्वको जसपालाई ओलीले मन्त्रीको समेत अपर गरेको बताईएको छ ।
सरकारलाई समर्थन गरेपनि उक्त पार्टी सरकारमा भने सहभागी छैन । बरु उक्त पार्टीले केही अघि समर्थन फिर्ता लिने निर्णय लिएको थियो । तर त्यसको औपचारिक कार्यान्वयन भने गरिसकेको छैन ।
कांग्रेस र एमाले मिल्दा पनि राष्ट्रिय सभामा सरकारको पक्षमा बहुमत नभएकाले प्रतिनिधिसभामा ५ र राष्ट्रिय सभामा ३ सदस्य भएको जसपा नेपाललाई सरकारमा ल्याउने गृहकार्य प्रधानमन्त्री केपी शर्मा ओलीले गरेका हुन् । त्यसमा कांग्रेसको समेत समर्थन छ ।
राष्ट्रिय सभामा अल्पमतमा पर्दा सरकारले चाहेजस्तो विधेयक पारित नहुने जोखिम बढेकाले पनि जसपा नेपाललाई सरकारमा ल्याउन खोजिएको बालुवाटार स्रोतले बतायो । ५९ सदस्यीय राष्ट्रिय सभामा बहुमतका लागि ३० सदस्य आवश्यक पर्छ । कांग्रेसका १६ र एमालेका १० सदस्य छन् । सरकारमा सहभागी लोसपाको १ र जसपा नेपालको ३ सदस्य पक्षमा हुँदा मात्रै सरकारलाई बहुमत पुग्छ ।
प्रधानमन्त्री ओलीले सोमबार राति बोलाएको बैठकमा अध्यक्ष यादव पार्टीका वरिष्ठ उपाध्यक्ष राजकिशोर यादवलाई लिएर बालुवाटार पुगेका थिए । बालुवाटारमा प्रधानमन्त्रीले ‘मधेशको मुख्य शक्ति नै तपाईंहरू, मिलेर जाऔँ, सरकारमा आउनुहोस्’ भनेर प्रस्ताव गरेका थिए ।
प्रधानमन्त्री ओलीले संसद्मा विचाराधीन भूमिसम्बन्धी विधेयक मंगलबारको संसद् बैठकको कार्यसूचीमा चढाउन निर्देशन दिएर बैठकमा बोलाएपछि जसपा नेपालका नेताहरू सुरुमै झस्किएका थिए ।
