काठमाडौं । काठमाडौं महानगरपालिकाले पिउने प्रशोधित पानीको जारमाथिको अनुगमनलाई तीव्रता दिएको छ । बर्खायाममा पानीबाट सर्ने रोगहरूको जोखिम बढ्दै गएपछि महानगरले प्रशोधित पानीको अनुगमन र कारबाहीलाई एकसाथ अघि बढाएको हो ।
पछिल्लो एक हप्तामा मात्रै महानगरले विभिन्न स्थानबाट मापदण्ड विपरीतका २७१ वटा जार बरामद गरी नष्ट गरिएको जनाएको छ । महानगरको अनुगमनको जिम्मा लिएको कृषि तथा पशुपन्छी विभागका प्रमुख नुरनिधि न्यौपानेकाअनुसार असार र साउन महिनामा मात्रै १३९ वटा गाडीको जाँच गर्दा ४५६ वटा फोहोर, कुच्चिएका र मापदण्ड नपुगेका जारहरू बरामद गरी नष्ट गरिसकिएको छ ।
‘बर्खा याममा पानीजन्य रोगहरूको जोखिमलाई मध्यनजर गर्दै हामीले प्रशोधित पिउने पानीको गुणस्तरमा विशेष ध्यान दिएका छौँ’ न्यौपानेले भने- ‘मापदण्ड विपरीतका जारहरूले तिम्रो स्वास्थ्यमा गम्भीर असर पार्न सक्छ। त्यसैले हामीले यस्ता जारहरू तत्काल जफत गरी नष्ट गर्ने र कम्पनीहरूलाई कडा निर्देशन दिने काम गरिरहेका छौँ ।’
चालु आर्थिक वर्ष सुरु भएयता महानगरले बल्खु, चाबहिल–चुच्चेपाटी, माछापोखरी–बालाजु र कोटेश्वरजस्ता मुख्य क्षेत्रहरूमा चेकपोस्ट राखेर अनुगमन गरेको हो । पछिल्लो एकहप्ता यता साउन १८ गते कोटेश्वरमा १५ वटा सवारी साधनको अनुगमन गर्दा ७७ वटा मापदण्ड विपरीतका जार बरामद गरेको थियो ।
साउन २० गते बल्खुमा ८ वटा कम्पनीका सवारी साधन जाँच गर्दा ५९ वटा कुच्चिएका, फुटेका र फोहोर जारहरू भेटिएको थियो । साउन २१ गते चाबहिल–चुच्चेपाटीमा १९ वटा सवारी साधनको अनुगमनमा ६७ वटा जार बरामद गरियो। साथै पानीको गुणस्तर जाँच्न ३ वटा जारको नमुना प्रयोगशालामा पठाइएको छ।
यस्तै साउन २३ गते माछापोखरी–बालाजुमा २० वटा सवारी साधनको अनुगमन गर्दा ६८ वटा मापदण्ड विपरीतका जारहरू फेला परे, जसलाई नष्ट गर्न पठाइएको महानगरले जनाएको छ ।
अनुगमनका क्रममा महानगरले पानी उत्पादक कम्पनीहरूलाई मापदण्ड विपरीतका जारमा पानी बिक्री नगर्न, जारमा उत्पादन मिति र कम्पनीको स्पष्ट लेबल राख्न, बिल–बिजक साथमा लिएर हिँड्न र पानीको गुणस्तरमा संवेदनशील हुन कडा निर्देशन दिएको छ ।
फुड टेक्नोलोजिस्ट अशोक पराजुलीले पानीको भौतिक र जैविक गुणस्तर जाँच्नु अत्यन्त महत्त्वपूर्ण रहेको बताए । उनले भने- ‘प्रयोगशालामा पठाइएका नमुनाहरूको परीक्षणबाट पानीको शुद्धता र सुरक्षितता सुनिश्चित गर्नेछौँ। तिमीजस्ता नागरिकको स्वास्थ्य हाम्रो पहिलो प्राथमिकता हो ।’
विगतमा बल्खु, कालीमाटी र टङ्केश्वरजस्ता क्षेत्रमा हैजाका बिरामी भेटिएकोले यस्ता जोखिम कम गर्न महानगर संवेदनशील बनेको र आगामी दिनमा समुदायस्तरमा पानी परीक्षण र सचेतना कार्यक्रमहरू पनि सञ्चालन गरिने पराजुलीले जानकारी दिए ।
