ललितपुर । ललितपुर महानगरपालिकाको सहयोगमा जुम्लामा मन्दिर निर्माण हुने भएको छ । त्यसका लागि मेयर चिरिबाबु महर्जसहितको प्रतिनिधिमण्डल जुम्ला पुगेका छन् ।
उक्त प्रतिनिधिमण्डलमा मेयर महर्जनसहित प्रमुख प्रशासकीय अधिकृत रेखा दास श्रेष्ठ, महानगरका निर्देशक देवप्रसाद गुरागाईं, वडा नं २८ का अध्यक्ष वीरेन्द्र महर्जन छन् ।
चन्दननाथ नगरपालिकामा गणेश मन्दिर निर्माणका लागि महानगरले ३५ लाख रुपैयाँ सहयोग गरेको प्रमुख महर्जनले बताए । चन्दननाथका मेयर राजु सिंह कठायतका अनुसार मन्दिर १९ लाख ७५ हजार रुपैयाँमा निर्माणसम्पन्न भएको हो भने बाँकी रकम मन्दिरको गेट निर्माणमा गरिने उनले जानकारी दिए ।
महानगरका अनुसार गणशेको मूर्ति बनाउने ढुंगा खोकनाबाट लगिएको थियो भने मन्दिर निर्माणका लागि ललितपुरकै कालिगढहरूलाई लगाइएको थियो । मन्दिर चन्दननाथ नगरपालिकाको वडा नं ५ मा अवस्थित छ ।
१० वटा वडा रहेको चन्दननाथसँग ललितपुर महानगरले तीन वर्षअघि भगिनी सम्बन्ध कायम गरेको थियो । चन्दननाथसँग मिलेर ललितपुर महानगरले विभिन्न परियोजना कायम गर्दै आएको छ । मेयर महर्जनले भगिनी सम्बन्ध कायम भएका पालिकालाई सहयोग गर्नु जिम्मेवारी सम्झिएको बताए ।
महर्जनले भगिनी सम्बन्ध भएका पालिकाहरूलाई महानगरले सम्पदा र वातावरणमैत्री परियोजनालाई सहयोग गर्दै आएको पनि बताए । मेयर महर्जनका अनुसार ललितपुर महानगरको आकृति झल्कने संरचना निर्माणलाई प्राथमिकतामा राखिएको छ । यस्तो परियोजनामा आगामी दिनमा पनि महानगरको सहयोग रहने महर्जनले प्रतिबद्धता जनाए ।
