काठमाडौं । बंगलादेशले २०२६ को आईसीसी टी–२० विश्वकपमा सहभागिता जनाउने कि नजनाउने भन्ने विषयमा जनवरी २१ सम्म अन्तिम निर्णय लिनुपर्ने भएको छ । आईसीसीले ढाकामा सम्पन्न बैठकमार्फत बंगलादेश क्रिकेट बोर्ड (बीसीबी) लाई सो समयसीमा जानकारी गराएको हो ।
बीसीबीले विश्वकप खेल्न चाहेको भए पनि भारतमा खेल्न नसक्ने अडान दोहोर्याएको छ । भारतमा खेल्दा सुरक्षाको चिन्ता रहेको भन्दै बंगलादेशले श्रीलंका सह–आयोजक भएकाले वैकल्पिक स्थल बनाउन सकिने प्रस्ताव अघि सारेको छ । तर आईसीसीले तालिका परिवर्तन नहुने स्पष्ट पार्दै बंगलादेशलाई समूह ‘सी’ मै राख्ने अडान लिएको छ ।
तालिकाअनुसार बंगलादेशको पहिलो खेल फेब्रुअरी ७ मा कोलकातामा वेस्ट इन्डिजविरुद्ध हुनेछ । त्यसपछि उसका थप दुई खेल पनि कोलकातामै र अन्तिम समूह खेल मुम्बईमा हुने तय छ ।
आईसीसीले भारतमा कुनै विशेष सुरक्षा खतरा नरहेको भन्दै बंगलादेशलाई आश्वस्त पारेको छ । स्वतन्त्र सुरक्षा एजेन्सीको प्रतिवेदनअनुसार भारतमा समग्र खतरा स्तर मध्यमदेखि उच्च भए पनि कुनै पनि सहभागी टोलीमाथि प्रत्यक्ष खतरा देखिएको छैन ।
यदि बंगलादेशले भारत जान अस्वीकार गरेमा, आईसीसीले उसको स्थानमा स्कटल्यान्डलाई विश्वकपमा सहभागी गराउने तयारी गरेको छ । स्कटल्यान्ड युरोप छनोट पार गर्न नसक्दा विश्वकपमा छनोट हुन सकेको थिएन । तर बंगलादेश बाहिरिएमा हाल विश्वकप नखेलेका टोलीमध्ये सबैभन्दा माथिल्लो वरियतामा रहेकाले स्कटल्यान्डले अवसर पाउनेछ ।
यो विवाद आईपीएल टोली कोलकाता नाइट राइडर्सले बंगलादेशी खेलाडी मुस्ताफिजुर रहमानलाई टोलीबाट हटाएपछि सुरु भएको हो । त्यसपछि बंगलादेश सरकारले आईपीएल प्रसारणमा प्रतिबन्ध लगाएको थियो भने बीसीबीले भारतमा विश्वकप नखेल्ने भन्दै आईसीसीलाई औपचारिक पत्र पठाएको थियो ।
