काठमाडौं । बुधबार सेयर बजारमा उत्साह देखिएको छ। अघिल्लो दिन ६ अंकले घटेको नेप्से परिसूचक आज ३०.०८ अंकले बढेर २७५४ अंकमा पुगेको छ।
कारोबार रकम पनि बढ्दै ३ अर्ब ८२ करोड रुपैयाँ पुगेको छ। आज २४८ कम्पनीको सेयर मूल्य बढ्दा २१ कम्पनीको घटेको छ भने एनएलजी इन्स्योरेन्सको मूल्य स्थिर रह्यो।
सबै समूहका सूचक हरियो हुँदा हाइड्रोपावर र होटल तथा पर्यटन समूह सबैभन्दा धेरै १.८९ प्रतिशतले बढे। अपर लोहोरेखोला जलविद्युतको मूल्य सबैभन्दा धेरै १५ प्रतिशतले उकालो लागेको छ।
त्यस्तै माउन्टेन हाइड्रो नेपाल, बुंगल हाइड्रो, शिखर पावर र सिटी होटलका लगानीकर्ताले पनि राम्रो नाफा कमाएका छन्। कारोबार रकमका आधारमा कर्पोरेट डेभलपमेन्ट बैंक, आँखुखोला जलविद्युत्, अपी पावर, रिडी पावर र नेसनल हाइड्रोपावर अगाडि रहे।
