काठमाडौँ । राजावादी अभियन्ता तथा व्यवसायी दुर्गा प्रसाईँलाई आइतबार झापाबाट काठमाडौं फर्किने क्रममा त्रिभुवन अन्तर्राष्ट्रिय विमानस्थलबाट नेपाल प्रहरीले केही समय नियन्त्रणमा लिएर उनकै भक्तपुरस्थित निवाससम्म पुर्याएको छ।
प्रहरीले उनलाई औपचारिक रूपमा हिरासतमा नराखी सुरक्षाको व्यवस्थापनका लागि नियन्त्रणमा लिएको जनाएको छ। काठमाडौं प्रहरी परिसरका प्रवक्ता एसपी पवन भट्टराईका अनुसार विमानस्थलको निषेधित क्षेत्रमा सार्वजनिक अभिव्यक्ति वा पत्रकारसँग प्रतिक्रिया दिन नदिने उद्देश्यले उक्त कदम चालिएको हो।
प्रसाईँ काठमाडौं आइपुग्ने जानकारी पाएपछि विमानस्थलमा विभिन्न सञ्चारमाध्यम र अनलाइन प्लेटफर्मका प्रतिनिधि तथा युट्युबरहरूको उपस्थिति देखिएको थियो। तर सुरक्षाकर्मीले उनीहरूलाई विमानस्थलको प्रवेशद्वारमै रोकेपछि प्रसाईँले सञ्चारकर्मीसँग कुनै प्रतिक्रिया दिन पाएनन्।
सुरक्षा निकायका अधिकारीहरूका अनुसार पछिल्ला दिनमा मुलुकको राजनीतिक वातावरण संवेदनशील बनेको छ। यस्ता परिस्थितिमा सार्वजनिक स्थलबाट आउने उत्तेजक वा विवादास्पद अभिव्यक्तिले थप तनाव सिर्जना गर्न सक्ने आकलन गर्दै प्रहरीले सम्भावित जोखिम न्यूनीकरणका लागि विशेष सावधानी अपनाएको बुझिएको छ।
यसै कारण प्रसाईँलाई विमानस्थलबाट सिधै प्रहरीको सवारीमार्फत निवासतर्फ लगिएको स्रोतहरूको भनाइ छ। प्रहरीले भने यो कदम कानुन–व्यवस्था र सार्वजनिक शान्ति कायम राख्ने उद्देश्यले चालिएको जनाएको छ।
दुर्गा प्रसाईँ पछिल्लो समय आफ्ना सार्वजनिक अभिव्यक्ति र राजनीतिक गतिविधिका कारण निरन्तर चर्चामा रहँदै आएका छन्।
