काठमाडौं । अर्थमन्त्री डा. स्वर्णिम वाग्लेले आन्तरिक राजस्व विभागको स्थलगत अनुगमन गर्दै चालु आर्थिक वर्षको बजेट कार्यान्वयन र राजस्व संकलनको लक्ष्य हासिल गर्न विभागको तयारीबारे जानकारी लिएका छन् ।
बिहीबार लाजिम्पाटस्थित विभागको कार्यालय पुग्नुभएका मन्त्री वाग्लेले बजेटमा निर्धारण गरिएको राजस्व लक्ष्य पूरा गर्न विभागले गरेका तयारी, कार्ययोजना तथा कार्यान्वयन अवस्थाबारे विभागीय नेतृत्वसँग छलफल गरे ।
अनुगमनका क्रममा अर्थमन्त्री वाग्ले र अर्थसचिव डा. घनश्याम उपाध्यायले विभाग तथा मातहतका देशभरका कार्यालयका कर्मचारीलाई राजस्व संकलनलाई प्रभावकारी बनाउन, कर प्रशासनलाई थप चुस्त र पारदर्शी बनाउन तथा बजेट कार्यान्वयनलाई नतिजामुखी बनाउन निर्देशन दिए ।
सो अवसरमा आन्तरिक राजस्व विभागका महानिर्देशक भीष्मकुमार भुसालले विभागको वर्तमान साङ्गठनिक संरचना, चालु आर्थिक वर्षको राजस्व संकलन लक्ष्य, लक्ष्य प्राप्तिका लागि तयार पारिएका रणनीति तथा कार्ययोजनाबारे प्रस्तुतीकरण गरेका थिए ।
विभागले कर प्रशासनलाई थप प्रभावकारी बनाउँदै राजस्व संकलनको लक्ष्य हासिल गर्न आवश्यक तयारी अघि बढाएको जानकारी दिएको छ।
