काठमाडौं । चालु आर्थिक वर्ष २०८१/८२ को पहिलो त्रैमासको वित्तीय विवरण २० वटै वाणिज्य बैंकले सार्वजनिक गरेका छन् । बुधबार सार्वजनिक पहिलो त्रैमासको वित्तीय विवरणअनुसार २० वाणिज्य बैंकले १६ अर्ब २३ करोड १८ लाख रुपैयाँ नाफा आर्जन गरेका छन् ।
गत आर्थिक वर्षको सोही अवधिमा वाणिज्य बैंकले १३ अर्ब ३४ करोड ४८ लाख रुपैयाँ नाफा आर्जन गरेका थिए । गत वर्षको तुलनामा बैंकहरूको नाफा औसतमा २१.६३ प्रतिशतले वृद्धि भएको हो ।
सर्वाधिक नाफा वृद्धि गर्नेमा सिद्धार्थ, लक्ष्मी सन्राइज, नेपाल र कुमारी बैंक छन् । यी बैंकले ३०० प्रतिशतभन्दा बढीले नाफा वृद्धि गरेका छन् । गत वर्षको तीन महिनामा २६ करोड ३९ लाख रुपैयाँ नाफा आर्जन गरेको कुमारी बैंकले यो वर्षको तीन महिनामा एक अर्बभन्दा बढी नाफा आर्जन गरेको छ । तर, बढी नाफा वृद्धि गर्ने तीन बैंकले भने एक अर्ब नाफा पुर्याउन सकेका छन् ।
चालु वर्षको तीन महिनामा सबैभन्दा बढी नाफा भने नबिल बैंकले गरेको छ । यो बैंकले चालु आर्थिक वर्षको तीन महिनामा दुई अर्ब पाँच करोड रुपैयाँ नाफा आर्जन गरेको छ । गत वर्षको सोही अवधिमा भने यो बैंकले एक अर्ब ४६ करोड ९३ लाख रुपैयाँ नाफा आर्जन गरेको थियो ।
ग्लोबल आइएमई बैंकले एक अर्ब ५१ करोड २१ लाख रुपैयाँ नाफा आर्जन गरेको छ । नेपाल इन्भेष्टमेन्ट मेगा बैंकले एक अर्ब ४६ करोड ४० लाख रुपैयाँ नाफा आर्जन गरेको छ ।
सातवटा वाणिज्य बैंकको नाफा घटेको छ । नाफा घट्नेमा नेपाल इन्भेष्टमेन्ट मेगा, माछापुच्छ्रे, सिटिजन्स बैंक, सानिमा, हिमालयन, राष्ट्रिय वाणिज्य र एनआईसी एशिया बैंक छन् । गत वर्षको तीन महिनाको अवधिमा ८८ करोड घाटामा भएको कृषि विकास बैंकले भने यो वर्षको तीन महिनामा १९ करोड नौ लाख रुपैयाँ नाफा आर्जन गरेको छ ।
कुनको कति नाफा?
| बैंक | नाफा (रु) |
| नबिल बैंक | २ अर्ब ५ करोड |
| ग्लोबल आईएमई बैंक | १ अर्ब ५१ करोड |
| नेपाल इन्भेष्टमेन्ट मेगा बैंक | १ अर्ब ४६ करोड |
| प्राइम कमर्सियल बैंक | १ अर्ब २८ करोड |
| एनएमबी बैंक | १ अर्ब १४ करोड |
| एभरेष्ट बैंक | १ अर्ब १२ करोड |
| कुमारी बैंक | १ अर्ब ७ करोड |
| प्रभु बैंक | १ अर्ब ४ करोड |
| स्ट्यान्डर्ड चार्टर्ड बैंक | ८६ करोड |
| नेपाल एसबीआई बैंक | ८१ करोड |
| हिमालयन बैंक | ७२ करोड |
| नेपाल बैंक | ६० करोड |
| लक्ष्मी सनराइज बैंक | ५३ करोड |
| माछापुच्छ्रे बैंक | ५० करोड |
| सानिमा बैंक | ३९ करोड |
| सिद्धार्थ बैंक | ३८ करोड |
| सिटिजन्स बैंक इन्टरनेशनल | २४ करोड |
| कृषि विकास बैंक | १९ करोड |
| राष्ट्रिय वाणिज्य बैंक | १५ करोड |
| एनआईसी एसिया बैंक | ११ करोड |
