दोर्दी गाउँपालिकाले अकबरे खुर्सानि खेतीका लागि चालु आर्थिक वर्षमा ३० लाख रुपैयाँ बजेट बिनियोजन गरेको छ । अकबरे खुर्सानीको व्यवसायीक खेति गर्न चाहने कृषकका लागि गाउँपालिकाले ५० प्रतिशत अनुदान दिनका लागि चालु आर्थिक वर्षमा यतिका बजेट बिनियोजन गरेको हो ।
चालु आर्थिक वर्षको वार्षिक स्वीकृत कार्यक्रम कृषि सहकारी उत्पादन तथा बजारीकरण, सुदृढिकरण कार्यक्रम अन्तर्गत बजेट बिनियोजन गरिएको गाउँपालिका अध्यक्ष युवराज अधिकारीले बताए । गत वर्ष दोर्दी गाउँपालिका ४ कामचोक, बाँसबोट र कुखुरेढुङ्गा गाउँमा परिक्षणको रुपमा गरिएको अकबरे खुर्सानी खेति सफल भएपछि यसवर्ष गाउँपालिकाले अकबरे खेतिको क्षेत्रफल विस्तार गर्नका लागि बजेट बिनियोजन गरेको अधिकारीले बताए ।
गाउँपालिकाले गत वर्ष विउ खरिद र मल्चिङ प्लाष्टिक खरिदका लागि दोर्दीे साना किसान सहकारी संस्थालाई ४० हजार रुपैयाँ अनुदान दिएको थियो ।
गतवर्ष करिव १५ रोपनी क्षेत्रफलमा गरिएको अकबरे खुर्सानी खेतिबाट १२ देखि १५ लाख रुपैयाँ सम्म आम्दानी गर्न सफल भएको दोर्दी साना किसान सहकारी संस्था लिमिटेडका अध्यक्ष सुकबहादुर गुरुङले बताए । गत वर्ष लगाइएको खुर्सानीको बोटले अझै पनि उत्पादन दिइरहेको छ ।
परिक्षणको रुपमा पहिलो पटक व्यवसायीक अकबरे खुर्सानी खेती सुरु गरेका दोर्दीका किसान यसपटक निकै उत्साहित बनेका छन् । उनिहरुले उत्पादन गरेको खुर्सानीले सहज रुपमा बजार पाएपछि उनिहरु झनै हौसीएका छन् ।
गतवर्ष परिक्षणका रुपमा गरिएको अकबरे खुर्सानी खेती सफल भएपछि गाउँपालिकाले यस वर्ष एउटा वडामा कम्तिमा पनि एकसय रोपनी क्षेत्रफलमा व्यवसायीक अकबरे खुर्सानी खेती गर्ने योजना बनाएको छ ।
गाउँपालिकाले पुष एक गते सार्वजकि सुचना जारी गर्दै व्यवासायीक अकबरे खुर्सानी खेति कार्यक्रममा सहभागी हुने चाहनेका लागि प्रस्ताव पेश गर्न अनुरोध गरेको छ । न्युनतम एक रोपनी क्षेत्रफलमा खुर्सानी खेति गर्न इच्छुक कृषक, कृषक समुह, कृषि फार्म र कृषि सहकारीले आवेदन दिन सक्ने सुचनामा उल्लेख गरिएको छ ।
गाउँपालिकाले बिउ खरिद, मल्चिङ प्लाष्टिक खरिद लगायतका लागि ५० प्रतिशत अनुदान दिने जनाएको छ । गाउँपालिकाले निशुल्क रुपमा प्राविधिक सहयोग समेत उपलब्ध गराउने जनाएको छ । इच्छुक कृषक, कृषक समुह, कृषि फार्म र कृषी सहकारीले पुष २१ गतेभित्र निवेदन सहित प्रस्ताव पेश गर्न सुचित गरेको छ ।
कृषक समुह, कषि फार्म दर्ता तथा नविकरण भएको प्रमाणपत्रको प्रतिलिपि, कृषक समुह, फार्म र सहकारीको हकमा निर्णयको प्रतिलिपि र कार्यक्रम सञ्चालन गर्ने प्रतिवद्धता पत्र पेश गर्नुपर्ने गाउँपालिकाले जनाएको छ ।
यसैगरी कार्यक्रम सञ्चालन हुने जग्गाको जग्गाधनी प्रमाणपुर्जाको प्रतिलिपि वा स्वामित्व वा हकभोग खुल्ने प्रमाणपत्रको प्रतिलिपि वा कम्तिमा पाँच वर्षको जग्गा भाडामा लिएको सम्झौता पत्र र त्यस्तो जग्गाको जग्गाधनी प्रमाणपुर्जा र वडा कार्यालयको सिफारीसको सहित निवेदन पेश गर्न गाउँपालिकाले अनुरोध गरेको छ ।
