काठमाडौं । २०२४ मा भारतमा टाटाको पन्च सबैभन्दा धेरै बिक्री हुने कार बन्यो । गतवर्ष टाटाले भारतमा २ लाख २ हजार ३० वटा पन्च बिक्री गरेर रेकर्ड बनाएको थियो । १० लाख भारतिय रुपैया भन्दा बढी मूल्यका एसयूभीको बिक्री बढ्दा मारुती सुजुकीको बजार हिस्सा प्रभावित हुन पुगेको थियो ।
२०२४ मा टाटा पन्चले मारुती सुजुकी वेगनआरलाई पछि पार्दै सर्वाधिक बिक्री हुने कार बनेको हो। गतवर्ष मारुती वेगनार १ लाख ९० हजार ८ सय ५५ वटा बिक्री भएको थियो । यसअघि मारुती सुजुकीका कार नै वर्षौँदेखि सर्वाधिक बिक्री हुने कारका रुपमा रहँदै आएको थियो ।
२०२१ मा सार्वजनिक भएको टाटा पन्च १ सय ९० एमएम ग्राउन्ड क्लियरेन्स सहित सब फारेमिटर एसयूभीका रुपमा बजरमा आएको थियो । सार्वजनिक भएपश्चात टाटा पन्च भारतमा मासिक १० हजारभन्दा बढी बिक्री हुँदै आएको छ ।
टाटा पन्च गत वर्ष ईभी भर्सनमा आएको थियो । टाटा पन्च र पन्च ईभी नेपाली बजारमा पनि उपलब्ध रहेको छ । टाटा मोटर्सको नेपालका लागि आधिकारिक बिक्रेता सिप्रदी ट्रेडिङ प्रा.लि.ले पन्चको आईसी र ईभी दुवै भर्सन बिक्री गरिरहेको छ । पन्च ईभी नेपाली बजरमा धेरैको रोजाइमा परेको एसयूभी कार हो।
