काठमाडौँ । संघीय मामिला तथा सामान्य प्रशासन मन्त्रालयले ७५३ वटै स्थानीय तहलाई सार्वजनिक निकायमा स्वदेशी वस्तुको प्रयोगलाई अनिवार्य गर्न निर्देशन दिएको छ ।
मन्त्रालयले आइतबार सबै स्थानीय तहलाई परिपत्र गर्दै उक्त निर्णय कार्यान्वयन गर्न निर्देशन दिएको हो ।
फागुन ५ गते बसेको सचिव बैठकको निर्णय अनुसार सार्वजनिक निकायमा स्वदेशी वस्तुको प्रयोग सम्बन्धी निर्देशिका सबै मन्त्रालयले अनिवार्य रुपमा कार्यान्वयन गर्ने र सोही प्रयोजनका लागि प्रदेश तथा स्थानीय तहलाई कार्यान्वयनको लागि अनुरोध गर्ने भनि आएकोले सोही अनुसार कार्यान्वयन गर्न भन्दै मन्त्रालयले स्थानीय तहलाई परिपत्र गरेको हो ।
गत पुस पहिलो साता बसेको मन्त्रिपरिषद्को बैठकले ‘सार्वजनिक निकायमा स्वदेशी वस्तु प्रयोग सम्बन्धी निर्देशिका २०८१’ स्वीकृत गरेको थियो ।
उक्त निर्देशिकामा स्वदेशी वस्तु सूचीमा स्टेसनरी, कार्यालयका सामान, छपाइ सम्बन्धी सामग्री छन् । यसैगरी पोसाक, कोसेली तथा उपहार, फर्निचर, फर्निसिङ, सरसफाइ, फ्लोरिकल्चर तथा साजसज्जा वस्तु र सामग्री राखिएको छ । निर्माण सामग्री, कृषि तथा पशुजन्य उत्पादन, खाद्य र पेय पदार्थ समेत स्वदेशी प्रयोग गर्नुपर्ने भएको छ ।
