काठमाडौं । सरकारले काठमाडौं उपत्यकामा बिक्री हुने जारको पानीमा निर्धारित मूल्यभन्दा बढी लिएको पाइएमा कारबाही गर्ने चेतावनी दिएको छ।
वाणिज्य, आपूर्ति तथा उपभोक्ता संरक्षण विभागले एक सूचना जारी गर्दै यस्तो चेतावनी दिएको हो। विभागका अनुसार काठमाडौं उपत्यकामा बिक्री हुने जार (२० लिटर) को मूल्य प्रतिगोटा अधिकतम ४७ रुपैयाँ तोकिएको छ भने एक लिटरको बोतल पानीको मूल्य १६ रुपैयाँ तोकिएको छ।
तोकिएको मूल्यभन्दा फरक पर्ने गरी होटल तथा रेस्टुरेन्टसँग सम्झौता गरी बढी मूल्यको एमआरपी राखेको भन्दै विभागले पानी उत्पादक कम्पनीहरुलाई सचेत गराएको हो। एमआरपीको नियम पालना नगरे कानुनअनुसार कारबाही गर्ने चेतावनी विभागले दिएको छ।
