काठमाडौं । शेयरबजारमा लगातार उछाल आउँदा बिहीबार बजार मापक परिसूचक नेप्से ३ हजारको बिन्दुमा पुगेको छ । बिहीबार साताको अन्तिम कारोबार दिन ४३.५१ अंकले बढ्दा नेप्से ३०००.८१ अंकमा पुगेर बन्द भएको छ ।
नेप्से बढेको दिन बिहीबार कारोबार पनि उल्लेख्य भएको छ । बिहीबार अलटाइम रेकर्ड ब्रेकिङ कारोबार हुँदा २९ अर्ब ९५ करोड ८५ लाख रुपैयाँबराबरको शेयर कारोबार भएको छ । सोमबारको कारोबार रकमको रेकर्ड बिहीबार तोडिएको हो । सोमबार २७ अर्ब २४ करोड रुपैयाँबराबरको शेयर कारोबार भएको थियो । बिहीबार ३३४ कम्पनीका ६ करोड ८९ लाख ८० हजार कित्ता शेयर किनबेच भएको छ ।
१३ उपसमूहमध्ये बिहीबार बैंकिङ उपसमूहको परिसूचक सर्वाधिक ५.६५ प्रतिशतले बढेको छ । सो उपसमूहका सबै बैंकहरूको शेयरमूल्य उच्च दरमा बढेको छ ।
म्युचुअल फन्ड र लगानी उपसमूहको परिसूचक २ प्रतिशतभन्दा बढीले बढेको छ भने विकास बैंक र व्यापार उपसमूहको परिसूचक १ प्रतिशतभन्दा बढीले बढेको छ । कारोबारमा आएको वित्त उपसमूहको परिसूचक यस दिन सर्वाधिक ३.०५ प्रतिशतले घटेको छ ।
