काठमाडौँ । सरकारले चार जना मलेसियन नागरिकलाई डिपोर्ट गर्ने निर्णय गरेको छ ।
सञ्चार तथा सूचना प्रविधिमन्त्री जगदीश खरेल सिंहदरबारस्थित सञ्चार तथा सूचना प्रविधि मन्त्रालयमा बुधबार आयोजित पत्रकार सम्मेलनमा मन्त्रिपरिषद्का निर्णय सार्वजनिक गर्दै उक्त कुरा जानकारी गराएका हुन् ।
मंसिर २ गते सिंहदरबारमा बसेको मन्त्रिपरिषद्को बैठकले नेपालमा भिसा नियमित नगरी अवैध रूपमा बसिरहेका उनीहरूलाई प्रचलित कानूनअनुसार नेपालबाट प्रस्थान हुने मितिसम्म बुझाउनुपर्ने विलम्ब शुल्क र जरिवाना मिनाहा गरी डिपोर्ट गर्ने निर्णय गरेको हो ।
यस्तै, मन्त्रिपरिषद्को बैठकले रुपन्देहीको मर्चवारी गाउँपालिकाको नाम परिवर्तन गरी मर्चवारीमाई गाउँपालिका र केन्द्र वडा नम्बर ३ रायपुरबाट परिवर्तन गरी वडा न ४ खैरा कायम गर्ने निर्णय गरेको छ ।
