काठमाडौँ । हास्य कलाकार धुर्मुस सुन्तली (सिताराम कट्टेल र कुञ्जना घिमिरे) अमेरिका भागेको आरोपपछि उनीहरुले आफूहरु नभागेको स्पष्ट पारेका छन् । केही दिन यता भरतपुरमा रंगशाला निर्माण गर्न नसकेपछि उनीहरु अमेरिका भागेको समाजारहरु बाहिरिएपछि उनीहरुले आफूहरु नभागेको स्पष्ट पारेका हुन् ।
शुक्रबार बिहान उनीहरुले सार्वजनिक गरेकाे बकपत्रमा भनिएकाे छ, ‘हामी भागेको होइन । छोरीको उपचार सम्पन्न भएपश्चात नेपाल फर्किनेमा कुनै सन्देह छैन । छोरीको उपचारपश्चात हामी नेपाल फर्किएर अब कलाकारितामै रम्न चाहन्छौं । तर, रंगशालाको उल्झनबाट मुक्ति नपाउँदासम्म हामीले नेपालमा न काम गरेर खान सक्ने, न चैनसित निदाउन सक्ने अवस्था रह्यो । हाम्रो यति चाहना छ, कि रंगशालाको समस्या समाधान भएर हामीले नेपालमै कलाकारिता गरेर बाँच्न सक्ने अवस्था बनोस ।’
यस्तै, उनीहरुले आफूहरु अमेरीका आएको विषयलाई लिएर भ्रामक प्रचारवाजी र हल्लाको व्यापार पनि शुरु भइसके उल्लेख गरेका छन् ।
‘जुन कुरा हामी सार्वजनिक गर्ने नै थियौँ । अहीले हामी नितान्त छोरीको उपचारमा केन्द्रित थियौँ । छोरीको उपचारको प्रक्रिया पनि शुरु भएको छ, हामी निरन्तर अपडेट पनि गर्नेछौ । न त हामीले अमेरीकामा कुनै ब्यवसाय शूरु गरेको छौ न त कुनै लगानी नै छ । भ्रमको खेती गर्नेलाई धन्यवाद भन्नुवाहेक हामीसंग अरु कुनै शब्द छैन । अतः भ्रामक प्रचारवाजी र हल्लाको पछि नलागी दिनुहुन सबैलाई बिनम्र अनुरोध गर्दछौं, उनीहरुले सार्वजनिक गरिएको पत्रमा भनिएको छ ।’
