काठमाडौँ । सरकारलाई तिर्नुपर्ने बाँकी बक्यौता लामो समयसम्म नबुझाउने व्यक्ति तथा संस्थाहरूको नाम सार्वजनिक भएको छ । कुमारीचोक तथा केन्द्रीय तहसिल कार्यालयले सार्वजनिक सूचना जारी गर्दै कार्यालयले ५२ जना व्यक्ति तथा फर्महरूको तीनपुस्ते विवरणसहितको नामावली सार्वजनिक गरेको हो ।
उक्त सूचीमा नेपाल निर्माण व्यवसायी महासंका अध्यक्ष तथा निर्माण व्यवसायी रवि सिंहको महादेव खिम्ती निर्माण सेवाको समेत नाम उल्लेख रहेको पाइएको छ । यस्तै, निर्माण व्यवसायीहरू खुम्बु कन्स्ट्रक्सन, लोकप्रिय निर्माण सेवा, एम.एम. कन्स्ट्रक्सन कम्पनी लगायतका दर्जनौं निर्माण कम्पनीहरू सूचीमा छन् ।
यसैगरी अमेरिकाको टेक्सना रिसोर्सेस कम्पनी, युएईको एमिरेट्स एसोसिएटेड बिजनेस ग्रुप र बीबीबी च्याम्पियन्स आयल कम्पनी जस्ता विदेशी कम्पनीहरूले पनि सरकारी रकम नबुझाएको देखिएको छ ।
सशस्त्र प्रहरी बलका मनोज थापा, फुलबारी रिसोर्टका पियुष अमात्य लगायत विभिन्न जिल्लाका व्यवसायी तथा सरकारी सेवामा संलग्न रहेका व्यक्तिहरूको नाम समेत सूचीमा समावेश छ ।
यसअघि पटक–पटक पत्राचार गर्दा र कार्यालयको वेबसाइटमार्फत जानकारी गराउँदा पनि बक्यौता बुझाउन नआएपछि सरकारले अन्तिम पटकका लागि यो सार्वजनिक सूचना जारी गरेको जनाएको छ । सूचना प्रकाशित भएको मितिले ३५ दिनभित्र साँवा र नियमअनुसार लाग्ने ब्याजसहित सम्पूर्ण रकम चुक्ता गर्न कार्यालयले ताकेता गरेको छ ।
निर्धारित ३५ दिनको अवधिभित्र पनि रकम राफसाफ नगरेमा प्रचलित कानुनबमोजिम यी व्यक्तिहरूको चलअचल सम्पत्तिबाट सरकारी बाँकी असुल उपर गरिने सूचनामा उल्लेख छ । यस प्रक्रियामा ऋणीहरूको जायजेथा दाबी गरी सरकारी रकम असुल गर्दा उनीहरूलाई हुन सक्ने आर्थिक वा सामाजिक हानिनोक्सानीप्रति कार्यालय जिम्मेवार नहुने समेत स्पष्ट पारिएको छ ।
