काठमाडौँ । लमजुङका ८ स्थानीय तहमध्ये मस्र्याङदी गाउँपालिका स्वास्थ्य कार्यासम्पादनमा सबैभन्दा उत्कृष्ट पालिका बनेको छ ।
स्वास्थ्य कार्यालय लमजुङले विभिन्न सूचकका आधारमा तयार पारेको कार्यसम्पादनमा सात वटा पालिकालाई पछि पार्दै मर्स्याङ्दी गाउँपालिका पहिलो बनेको हो ।
स्वास्थ्य कार्यालयका अनुसार मर्स्याङ्दीले ७९ दशमलव ७ अंक प्राप्त गरेको छ । गत वर्ष सर्वोत्कृष्ट मध्यनेपाल नगरपालिका यसपटक भने दोस्रो हुँदै ७९ दशमलव १ अंक प्राप्त गरेको छ । सुन्दरबजार नगरपालिकाले ७४ दशमलव ०१ अंकका साथ तेस्रो स्थानमा छ ।
उत्कृष्ट पालिकाहरुलाई शुक्रबार बेंसीशहरमा एक कार्यक्रमको आयोजना गरी स्वास्थ्य कार्यालयले सम्मान गरेको छ । जिल्ला समन्वय समितिको सभाहलमा आयोजित कार्यक्रममा पालिकाहरुलाई स्वास्थ्य कार्यालय लमजुङका प्रमुख प्रविनकुमार खनाल, जिल्ला समन्वय समिति प्रमुख पूर्णबहादुर गुरुङ, क्षेत्रीय स्वास्थ्य निर्देशनालय पोखराका महानिर्देशक खिमबहादुर खड्कालगायतले सम्मानपत्र प्रदान गरे ।
उक्त कार्यक्रममा सबै पालिकाले गत आर्थिक वर्षमा गरेका स्वास्थ्य सम्बन्धी कार्यबारे पोष्टर सार्वजनिक गरेका थिए । पोष्टर निर्माण तथा सार्वजनिकीकरणमा क्व्होलासोथार गाउँपालिका पहिलो भएको छ ।
दोर्दी गाउँपालिका दोस्रो र सुन्दरवजार नगरपालिका तेस्रो भएका छन् । पोष्टर निर्माणमा उत्कृष्ट ठहरिएका पालिकाहरुलाई पनि स्वास्थ्य कार्यालयले सम्मान गरेको छ । कार्यक्रममा सवै स्थानीय तहका प्रमुख–अध्यक्षलगायतको उपस्थित थियो ।
