काठमाडौँ । गुल्मीको चन्द्रकोट गाउँपालिकाले ५० करोड ३४ लाख रुपैयाँको बजेट सार्वजनिक गरेको छ । पालिकाको १५ औ गाउँसभाको पहिलो तथा दोश्रो बैठकले गत असार १० गते आर्थिक वर्ष २०८१/८२ का लागि उक्त बजेट सार्वजनिक गरेको हो ।
जसमध्ये चालु खर्चतर्फ ३१ करोड ४१ लाख ७८ हजार (६२.४१ प्रतिशत) र पुँजीगततर्फ १८ करोड ९२ लाख ३१ हजार (३७.५९ प्रतिशत) बजेट प्रस्तुत गरिएको छ ।
गाउँपालिकाले पर्यटन, कृषि, रोजगार, शिक्षा, स्वास्थ्य र स्थानीय उत्पादन प्रवर्द्धनमा जोड दिएको छ । आफ्नै उत्पादन खाऔं, चन्द्रकोटमै रमाऔं भन्ने नाराका साथ उत्पादनमा जोड दिने अनुदानका कार्यक्रम ल्याएको गाउँपालिकले जनाएको छ ।
गाउँपालिका उपाध्यक्ष विष्णुप्रसाद भण्डारीले पेश गरेको आर्थिक वर्ष २०८०/०८१ को लागि तय भएको आर्थिक विधेयक २०८१ पेश सँगै पारित भएको छ । बैठकमा विनियोजन विधेयक २०८१ एवम् आर्थिक वर्ष २०७९/०८० को यथार्थ, चालू आ.व. २०८०/०८१ को संशोधित अनुमान तथा आगामी आर्थिक बर्ष २०८१/०८२ को अनुमानित व्यय सहितको बार्षिक बजेट तथा कार्यक्रम पेश गरिएको थियो ।
पालिकाका अध्यक्ष युवराज खत्रीले विकटलाई निकट बनाउने अभियान अन्र्तगत पूर्वाधारका कार्यक्रमहरु, उज्यालो पालिका बनाउने अभियानमा सडक बत्ती जडान गर्ने जस्ता कार्यक्रमहरु प्राथमिकतामा परेको बताए ।
