काठमाडौँ । सन नेपाल लाइफ इन्स्योरेन्सका प्रमुख कार्यकारी अधिकृत (सीईओ) माथि अनुसन्धान गर्न अदालतले प्रहरीलाई पाँच दिन म्याद थप गरिदिएको छ ।
सोमबार नेपाल प्रहरीको केन्द्रीय अनुसन्धान ब्युरो (सीआईबी) ले सीईओ राजकुमार अर्याललाई पक्राउ गरेको थियो । अर्याल सीईओमाथि थप अनुसन्धानका लागि अदालतले पाँच दिनको म्याद दिएको सीआईबीका प्रवक्ता प्रहरी वरिष्ठ उपरीक्षक शिवकुमार श्रेष्ठले जानकारी दिए ।
सीआईबीका अनुसार कम्पनीभित्र कर्मचारीलाई छुट्याइएको शेयर बाँडफाँड सम्बन्धमा नियमनकारी निकायलाई पेश गरिएको कागजातमा फरक–फरक विवरण भेटिएको आधारमा अनुसन्धान अघि बढाइएको हो ।
धितोपत्र सम्बन्धी ऐन, २०६३ को दफा १०० विपरित कसुर गरेको प्रारम्भिक निष्कर्ष नेपाल धितोपत्र बोर्डको प्रतिवेदनमा उल्लेख गरिएको छ । काठमाडौं जिल्ला अदालतबाट पक्राउ अनुमति प्राप्त भएपछि अर्याललाई सोमबार काठमाडौं महानगरपालिका–२९ न्यूप्लाजाबाट पक्राउ गरिएको थियो ।
