काठमाडौं । लामो प्रतीक्षापछि नेपाली क्रिकेटले ऐतिहासिक क्षणको स्वागत गर्न लागेको छ। साढे दुई वर्षको अन्तरालपछि घरेलु मैदानमा अन्तर्राष्ट्रिय खेल फर्किँदै छ, त्यसमा पनि पहिलोपटक फ्लडलाइटमुनि। ७ वैशाख साँझ कीर्तिपुरस्थित त्रिवि क्रिकेट मैदानमा नेपाल र यूएईबीच हुने टी–२० अन्तर्राष्ट्रिय खेल केवल एक खेल मात्र होइन, नेपाली क्रिकेटको नयाँ युगको सुरुवात पनि हो। लामो समयसम्म दिनमै सीमित रहेको खेल अब रातको उज्यालोमा प्रवेश गर्दैछ, जसले दर्शक र खेलाडी दुवैका लागि नयाँ अनुभव दिनेछ।
दुई वर्षअघि नेदरल्यान्ड्ससँगको रोमाञ्चक फाइनलपछि सुनसान बनेको कीर्तिपुर अब फेरि गुञ्जिने तयारीमा छ। यसबीचमा मैदानको स्वरूप नै परिवर्तन भएको छ । घाँसे पाखा हटेर प्यारापिट बनेको छ भने अन्तर्राष्ट्रिय स्तरको फ्लडलाइट जडान भइसकेको छ। यही स्तरोन्नतिले नेपाली क्रिकेटलाई नयाँ उचाइमा पुर्याउने अपेक्षा गरिएको छ।
नेपाल क्रिकेट संघ (क्यान)का अनुसार घरेलु मैदानमा रातको समयमा अन्तर्राष्ट्रिय खेल आयोजना हुनु नेपाली क्रिकेट इतिहासकै गर्वको विषय हो। दर्शकको हुटिङ र उज्यालो बत्तीबीच हुने यो खेलले खेलको रोमाञ्चलाई अझ उचाइमा पुर्याउनेछ।
यस ऐतिहासिक खेलसँगै नेपाली टोली पनि नयाँ संरचनासहित मैदान उत्रिँदैछ। कप्तानको जिम्मेवारी अब दीपेन्द्रसिंह ऐरीको काँधमा आएको छ। रोहित पौडेल, सोमपाल कामी, करण केसी र आसिफ शेखजस्ता अनुभवी खेलाडी अनुपस्थित हुँदा टोलीमा नयाँ ऊर्जा र परीक्षणको अवसर दुवै देखिएको छ।
नेपालको टोली अलराउन्डरले भरिएको छ, जसले बलिङ विकल्पलाई बलियो बनाएको छ। तर पेस बलिङमा अनुभवको कमी चुनौतीका रूपमा देखिन्छ। यसबीच, सन्दीप लामिछाने, कुशल भुर्तेल र हेमन्त धामीजस्ता खेलाडीहरूबाट उत्कृष्ट प्रदर्शनको अपेक्षा गरिएको छ।
नेपाल र यूएईबीच हालसम्म ११ टी–२० अन्तर्राष्ट्रिय खेल भएका छन्, जसमा नेपालले ६ र यूएईले ५ खेल जितेका छन्। कीर्तिपुरमा भएको एकमात्र खेल भने यूएईले जितेको इतिहास छ।
पछिल्लो भेटमा भने नेपालले १ रनको रोमाञ्चक जित निकालेको थियो, जसले यो प्रतिस्पर्धालाई अझ रोचक बनाएको छ। दुवै टोली हालै सम्पन्न आईसीसी टी–२० विश्वकप खेलेर आएका छन्। यद्यपि दुवैले समूह चरण पार गर्न सकेनन्, तर एक–एक जित निकाल्दै प्रतिस्पर्धात्मक प्रदर्शन देखाएका थिए। यही लयलाई निरन्तरता दिने लक्ष्यका साथ दुवै टोली मैदान उत्रिनेछन्।
