काठमाडौँ । सरकारले व्यक्तिगत तर्फ सबैभन्दा बढी कर तिर्ने भनेर सम्मान गर्दै आएको व्यवसायी नै बिचौलीया दीपक भट्टको साझेदार रहेको पाइएको छ ।
सरकारले सम्मान गर्दै आएको बहुराष्ट्रिय कम्पनी काल्सबर्गका नेपाल साझेदार राजबहादुर शाह नै बिचौलीया भट्टको साझेदार रहेको पाइएको हो ।
नेपाल धितोपत्र बोर्डले गरेको अध्ययन प्रतिवेदनमा उनै व्यवसायी शाहले रकम नै भुक्तानी नगरी विभिन्न कम्पनीको शेयर लिने गरेको खुलासा भएको हो ।
बोर्डको अध्ययनअनुसार शाहलाई दुई वर्षसम्म कैद सजाय हुने गरी सिफारिस गरिएको छ । शाह नेपालको मदिरा व्यवसायमा ठूला उद्योगीका रूपमा चिनिन्छन् ।
प्रतिवेदन अनुसार शाह हालै काल्सबर्गको नेपाल उत्पादक गोर्खा ब्रुअरीमा प्रवेश गरेका छन् । गोर्खा ब्रुअरीले राज ब्रुअरीलाई अधिग्रहण गरेपछि उनी काल्सबर्गसँग जोडिएका हुन् । सुरुवातमा उनको ८ प्रतिशत सेयर स्वामित्व रहेको र पछि १५ प्रतिशतसम्म पुग्ने व्यवस्था गरिएको छ ।
हाल उनी गोर्खा ब्रुअरीका सञ्चालक समितिका अध्यक्षसमेत रहेका छन् । शाह उधारो कारोबारमा समेत संलग्न रहेको पाइएको छ ।
उक्त प्रतिवेदन अनुसार शाहले धितोपत्र दलाल कम्पनी भृकुटी स्टक ब्रोकिङ्ग प्रालिलाई ८९ करोड ७० लाख ९७ हजार ३४६ रुपैयाँ ७१ पैसा तिर्न बाँकी छ । उनले २०८२ साउन २१ गतेदेखि उक्त रकम भुक्तानी नगरेको देखिएको छ ।
यस्तैगरी, शाहले उक्त रकम नतिरी निरन्तर उधारो कारोबार गरेको तथ्य भेटिएको छ ।
उनीले २०८२ असार २३ गतेदेखि साउन ४ गतेसम्म नेपाल रिइन्स्योरेन्स कम्पनीको १० लाख ५१ हजार २०४ कित्ता सेयर विभिन्न मूल्यमा कुल १ अर्ब ४१ करोड ८० लाख ७२ हजार ९३७ रुपैयाँ ९५ पैसामा खरिद गरेका थिए । जसमध्ये उनले ५२ करोड ५० लाख रुपैयाँ मात्र भृकुटी स्टक ब्रोकिङ्गलाई तिरेका छन् । बाँकी ८९ करोड ७० लाख ९७ हजार ३४६ रुपैयाँ ७१ पैसा अझै भुक्तानी हुन बाँकी रहेको छ ।
शाहले धितोपत्र खरिद गर्दा अग्रिम रकम जम्मा नगरी कारोबारको सीमा प्राप्त गरेको, भुक्तानी नगरे पनि ब्रोकरमार्फत सेयर खातामा जम्मा गरिएको पाइएको छ । यसरी नेपाल रिइन्स्योरेन्स कम्पनीको सेयर खरिद भएको देखिन्छ ।
त्यसैगरी, शाहले हिमालयन लाइफ इन्स्योरेन्सको १ लाख २५ हजार १११ कित्ता सेयर १६ करोड ५६ लाख ९२ हजार ९८२ रुपैयाँ ६० पैसामा खरिद गरेका छन् ।
यस्तै उनले शुभी अग्रवालको नाममा रहेको ३ लाख ९ हजार ९३६ कित्ता सेयर ४० करोड ७३ लाख १३ हजार ८९८ रुपैयाँ ७० पैसामा खरिद गरेको देखिएको छ ।
शाहले दीपक भट्टकै शैलीमा अग्रिम रकम नदिई कारोबार सीमा लिएर सेयर खरिद गरेको, पूर्ण भुक्तानी नगरे पनि सेयर आफ्नो खातामा प्राप्त गरेको देखिएको छ ।
यसले सेयरको मूल्य वृद्धि गराउन सहयोग पुगेको तथा लगानीकर्ता र धितोपत्र बजारलाई भ्रममा पार्ने काम भएको निष्कर्ष निकालिएको छ ।
