काठमाडौं । अमेरिका र इरानबीच हालै सम्पन्न युद्ध अन्त्यसम्बन्धी समझदारी कार्यान्वयनका विषयमा स्विट्जरल्यान्डमा शुक्रबार हुने तय भएको प्रत्यक्ष वार्ता अन्तिम समयमा स्थगित भएको छ।
स्विट्जरल्यान्डको विदेश मन्त्रालयले शुक्रबारका लागि तय गरिएको अमेरिका–इरान वार्ता नहुने पुष्टि गरेको छ। अमेरिकी उपराष्ट्रपति जेडी भान्सले इरानी प्रतिनिधिमण्डलसँग हुने भेटवार्ताका लागि तय गरेको स्विट्जरल्यान्ड भ्रमण स्थगित गरेपछि वार्ता पनि रोकिएको हो।
यसअघि अमेरिका र इरानबीच हालै भएको युद्ध अन्त्यसम्बन्धी समझदारीपत्र कार्यान्वयन गर्न शुक्रबारदेखि प्राविधिक तहको प्रत्यक्ष वार्ता सुरु हुने अपेक्षा गरिएको थियो। वार्ताको उद्देश्य युद्धविरामलाई स्थायित्व दिनुका साथै आणविक कार्यक्रम र क्षेत्रीय सुरक्षासम्बन्धी विषयमा थप सहमति जुटाउनु रहेको बताइएको थियो।
ह्वाइट हाउसले उपराष्ट्रपति भान्सको भ्रमण स्थगित हुनुको कारण ‘लजिस्टिक तथा व्यवस्थापकीय जटिलता’ रहेको जनाएको छ। भान्सले पनि वार्ताको अन्तिम तयारी पूरा नभएको र इरानी प्रतिनिधिमण्डलको यात्रा व्यवस्थापनमा केही प्राविधिक कठिनाइ देखिएको बताएका थिए।
यद्यपि अमेरिकी तथा क्षेत्रीय कूटनीतिक स्रोतहरूले लेबननमा युद्धविराम जारी रहे पनि बढ्दो तनाव र सुरक्षासम्बन्धी चिन्ताले वार्ता प्रभावित भएको संकेत गरेका छन्। केही रिपोर्टअनुसार इरानले पनि क्षेत्रीय परिस्थितिको समीक्षा नगरी प्रतिनिधिमण्डल पठाउन हतार नगर्ने संकेत दिएको थियो।
वार्ता स्थगित हुनुअघि इरानका सर्वोच्च नेता मोज्तबा खामेनेईले अमेरिकी पक्षसँग प्रत्यक्ष वार्ता गर्न इरानी वार्ताकारहरूलाई अनुमति दिएका थिए। तर उनले उक्त निर्णयलाई अमेरिकी धारणा स्वीकार गरिएको रूपमा व्याख्या नगर्न चेतावनी दिएका थिए। त्यसपछि इरानका संसद् सभामुख तथा मुख्य वार्ताकार मोहम्मद बाघेर घालिबाफले वार्तामा इरानका राष्ट्रिय अडानहरू कायम राखिने बताएका थिए।
वार्ता स्थगित भएसँगै युद्धपछिको कूटनीतिक प्रक्रियामा अस्थायी अवरोध आएको छ। यद्यपि ह्वाइट हाउसले अमेरिका पहिलो उपलब्ध अवसरमै वार्ता अघि बढाउन तयार रहेको जनाएको छ र दुवै पक्षले प्राविधिक वार्ता चाँडै सुरु हुने अपेक्षा व्यक्त गरेका छन्।
