काठमाडौँ । पाकिस्तानको ८,०४७ मिटर अग्लो ब्रोड पिक आरोहणका क्रममा हिमपहिरोमा परेका सबै १० आरोहीको निधन भएको पुष्टि भएको छ। टोलीमा रहेका ६ नेपाली र ४ विदेशी आरोहीको ज्यान गएको हो।
बिहीबार आरोहणका क्रममा आएको हिमपहिरोमा परी टोली सम्पर्कविहीन बनेको थियो। खोजी अभियानका क्रममा शुक्रबार चार जनाको शव फेला परेको थियो, जसमध्ये तीन जनाको पहिचान सोही दिन खुलेको थियो। पछि बाँकी आरोहीको पनि मृत्यु भएको पुष्टि भएको हो।
दुःखद घटनाप्रति प्रधानमन्त्री वालेन्द्र शाहले गहिरो दुःख व्यक्त गर्दै सामाजिक सञ्जालमार्फत श्रद्धाञ्जली अर्पण गरेका छन्। उनले लेखेका छन्, ‘सम्पूर्ण दिवङ्गत आरोहीहरूप्रति भावपूर्ण श्रद्धाञ्जली। शोकसन्तप्त परिवारजन, आफन्त तथा शुभेच्छुकहरूप्रति हार्दिक समवेदना।’
यस दुर्घटनामा ज्यान गुमाउने नेपाली आरोहीमा विश्वप्रसिद्ध पर्वतारोही निर्मल पुर्जा, पुरबहादुर गुरुङ, निमा शेर्पा, किली पेम्बा शेर्पा, ग्यालु शेर्पा र नवाङ थिन्दु शेर्पा रहेका छन्।
त्यस्तै, ज्यान गुमाउने विदेशी आरोहीमा ओमानकी नाधिरा अहमद अब्दुल्लाह अल हार्थी, पाकिस्तानका सोहेल साखी, चीनका वाङ झोङ र अमेरिकाकी म्यालोरी गाइस रहेका छन्। नाधिरा अल हार्थी र म्यालोरी गाइसको शव शुक्रबार नै फेला परेको थियो।
यो दुर्घटना हालका वर्षहरूमा ब्रोड पिकमा भएका सबैभन्दा दुःखद पर्वतारोहण दुर्घटनामध्ये एक मानिएको छ।
