काठमाडौँ । काठमाडौँको त्रिपुरेश्वरमा बसमा भएको आगलागीमा परी गम्भीर घाइते भएका चालकको मृत्यु भएको छ। कीर्तिपुर अस्पताल (बर्न अस्पताल) मा उपचाररत चालकको सोमबार राति नै मृत्यु भएको हो।
उपचारमा संलग्न कीर्तिपुर अस्पतालका एक चिकित्सकले बस चालकको राति नै मृत्यु भएको पुष्टि गरे।
सोमबार मध्याह्न त्रिपुरेश्वरस्थित राहदानी विभागअगाडि ऋद्धिसिद्धि यातायातको बसमा आगलागी भएको थियो। आगोको लपेटामा परेर चालक लामा गाडीभित्रै गम्भीर घाइते भएका थिए।
घटनालगत्तै उद्धारमा खटिएका सुरक्षाकर्मी र स्थानीयले लामालाई अचेत अवस्थामा गाडीबाट निकालेर तत्कालै कीर्तिपुर अस्पताल पुर्याएका थिए। उद्धार गर्दा उनी बोल्न सक्ने अवस्थामा थिएनन्।
यसैबीच, ट्राफिक प्रहरीसँगको विवादपछि आक्रोशित बनेर चालक लामा आफैँले बसमा आगो लगाएको भन्नेबारे छानबिन गर्न काठमाडौं उपत्यका प्रहरी कार्यालयले समिति समेत गठन गरेको छ।
