काठमाडौं । शुक्रबार सार्वजनिक भएको आर्थिक वर्ष २०८२/८३ को मौद्रिक नीतिले सेयर बजारमा सकारात्मक प्रभाव पारेको छ। आइतबार बिहान बजार खुलेसँगै लगानीकर्ताको उत्साह देखिएको हो।
बजार खुलेको केवल १ मिनेटमै नेप्से परिसूचक ६६ अंकले उकालो लागेको थियो। बिहान ११:०१ बजे २७९७ अंक पुगेर उच्च विन्दु छोएको बजार त्यसपछि केही समयका लागि बिक्री दबाबमा परेको थियो।
तर ११:३० बजेसम्म बजारले पुनः सम्हालिँदै ४० अंकको वृद्धि गर्दै नेप्से २७७२ अंकमा स्थिर भएको छ।
यस अवधिमा २ अर्ब ७८ करोड रुपैयाँभन्दा बढीको कारोबार भएको छ। कुल २१३ कम्पनीको शेयर मूल्य बढ्दा केवल ३३ कम्पनीको घटेको देखिएको छ।
विशेषतः बैंकिङ, फाइनान्स र माइक्रोफाइनान्स समूहमा उल्लेखनीय वृद्धि देखिएको छ।
बैंकिङ उपसूचक २.५६%
फाइनान्स उपसूचक २.५७%
माइक्रोफाइनान्स उपसूचक ३.४२% ले उकालो लागेको छ।
गत शुक्रबार सार्वजनिक मौद्रिक नीतिमा माइक्रोफाइनान्स कम्पनीहरूलाई लाभांश वितरणको सीमा खुकुलो पार्ने संकेत, फाइनान्स कम्पनीहरूलाई निक्षेप संकलन थप फराकिलो बनाउने व्यवस्था, र बैंकहरूको नाफा तथा कारोबार विस्तार सहज बनाउने योजनाले बजारमा सकारात्मक सन्देश दिएको विश्लेषकहरू बताउँछन्।
