काठमाडौं । पोखरामा कोरोना संक्रमणका कारण ७४ वर्षीया महिलाको मृत्यु भएको छ। स्वास्थ्य निर्देशनालय गण्डकीका निर्देशक खीमबहादुर खड्काले घटनाको पुष्टि गरेका हुन्।
उनका अनुसार, “७४ वर्षीया महिला ८ दिनअघि कोरोना पोजेटिभ देखिएकी थिइन् र उनी चरक अस्पतालमा उपचाररत थिइन्। हिजो उनको मृत्यु भएको जानकारी प्राप्त भएको हो।”
अस्पताल प्रशासनका अनुसार ती महिलामा उच्च रक्तचाप र मधुमेहको समस्या पनि थियो। निर्देशक खड्काले भने, “अरू रोगहरू पनि थिए भन्ने कुरा आएको छ। तर कोरोना संक्रमण पुष्टि भएको हो र त्यो सहायक कारण हुनसक्छ।”
गण्डकी प्रदेशमा कोरोना संक्रमण दर बढ्दो
स्वास्थ्य निर्देशनालयका अनुसार हाल गण्डकी प्रदेशभर ८ जना संक्रमित उपचाररत छन्। तीमध्ये कास्कीमा ५ जना, बागलुङमा २ जना, स्याङ्जामा १ जना रहेका छन्।
स्वास्थ्य अधिकारीहरूले संक्रमणको दर फेरि बढ्न थालेको भन्दै सावधानी अपनाउन आग्रह गरेका छन्।
