काठमाडौं । तीन कारोबार दिनपछि सोमबार सेयर बजार बढेको छ। नेपाल स्टक एक्सचेन्ज (नेप्से) २१.३० अंक बढेर २७६१ अंकमा कायम भएको छ। आज दिउँसो २:३० बजे नेप्से २७६४ अंकमा पुगेर अधिकतम अंक देखाएको थियो।
आज १७९ कम्पनीको मूल्य बढ्दा ७१ कम्पनीको मूल्य घटेको छ। तर, बजार बढ्दा पनि कारोबार रकम घटेको छ। अघिल्लो दिन ६ अर्ब ५४ करोडको कारोबार भएकोमा आज ५ अर्ब ७५ करोड मात्रै भयो।
धेरै समूहका सूचक आज सकारात्मक देखिएका छन्। अन्य समूह सबैभन्दा धेरै २.७९ प्रतिशतले बढेको छ। विशेषगरी नेपाल पुनर्बीमा र हिमालयन रिइन्स्योरेन्स कम्पनीको मूल्य वृद्धिले यस समूहलाई माथि उठाएको छ।
समूहगत वृद्धिमा बैंकिङ ०.५८%, विकास बैंक ०.९५%, फाइनान्स ०.२०%, होटल तथा पर्यटन ०.४५%, हाइड्रोपावर ०.३२%, लगानी ०.३४%, जीवन बीमा ०.५६%, माइक्रोफाइनान्स १.५०%, निर्जीवन बीमा ०.३१% र व्यापार ०.०५% ले बढेका छन्। उत्पादन तथा प्रशोधन समूह मात्र ०.०५% घटेको छ।
आज दुई कम्पनीको मूल्य १० प्रतिशतले बढेको छ। नारायणी डेभलपमेन्ट बैंक र विकास हाइड्रोपावर १०% ले बढेका छन्। अन्य प्रमुख बढुवामा साना किसान विकास बैंक ५.२६%, नेपाल पुनर्बीमा ५.१०%, माहुली लघुवित्त ४.४८%, उन्नति सहकार्य लघुवित्त ४.२५%, मिथिला लघुवित्त ४.२५%, हिमालयन रिइन्स्योरेन्स ३.३६% रहेका छन्।
सबैभन्दा बढी मूल्य घट्नेमा सिक्लेस हाइड्रोपावर ३.५४%, सीवाईसी लघुवित्त ३.५०% र खानीखोला हाइड्रोपावर २.६३% रहेका छन्।
आज उच्च कारोबार भएका कम्पनीमा नेपाल पुनर्बीमा, हिमालयन रिइन्स्योरेन्स, हिमालयन डिस्टिलरी, राधि विद्युत् र छिमेक लघुवित्त वित्तीय संस्था रहेका छन्।
