काठमाडौँ । शेयर बजारमा बुधबार दिनभर उत्तारचढाब आएको छ । बुलिश बजार रहेको नेप्से सूचकमा गिरावट आउन थालेसँगै लगानीकर्ता नाफा बुक गर्न तर्फ केन्द्रित भएका छन् ।
नेप्से बजार बन्द हुनेबेलासम्म आइपुग्दा ३।८० अंकले बढेर २ हजार ७८६।४० विन्दुमा आइपुगेको छ । नेप्से सूचक सामान्य अंकले बढे पनि कारोबार रकम ह्वात्तै घटेको छ । विस्तारै नाफा बुक गर्ने लगानीकर्ता सकिदै गएका देखिन्छन् । किन्ने लगानीकर्ता नहुने र नाफा बुक गर्ने लगानीकर्ता मात्र हुँदा कारोबार रकम घट्ने विज्ञहरु बताउँछन् ।
धितोपत्र र ऋणपत्रगरी कारोबारमा आएका ३२६ कम्पनीको ३ करोड ५० लाख कित्ता शेयर खरिदविक्रिहुँदा १३ अर्ब ७२ करोड ७३ लाख रुपैयाँको कारोबार भएको छ । सर्वाधिक कारोबार हुने कम्पनीमा चन्द्रागिरी हिल्स कम्पनीको ४३ करोड ७ लाख ८६ हजार रुपैयाँको कारोबार भएको छ ।
त्यस्तै दोस्रो ठुलो कारोबार गर्ने कम्पनीमा नेपाल फाइनान्स, हिमालयन रिइन्स्योरेन्स कम्पनी, अपी पावर कम्पनी, अरुणभ्याली हाइड्रो पावर कम्पनीको ३३ करोड ९७ लाख रुपैयाँको कारोबार भएको छ ।
चारवटा कम्पनीको शेयर मूल्यमा सर्किट लागेको छ । लिवर्टी इनर्जी पावर, हिमालयन हाइड्रो, मिडसोलु हाइड्रो पावर कम्पनीको शेयर मूल्य १० प्रतिशतले बढेर सर्किट लागेको छ ।
