काठमाडौं । नेपाली कांग्रेसको केन्द्रीय कार्यसमिति बैठक बिहीबारबाट शुरू हुँदैछ र बैठक ८ वटा एजेन्डामा केन्द्रित हुने भएको छ।
मुख्य एजेन्डामा जेनजी आन्दोलनबाट विकसित घटना, १५ औँ महाधिवेशन, प्रतिनिधिसभा विघटन र फागुन २१ गते हुने निर्वाचन रहेका छन्। कार्यसम्पादन समितिको बैठकले यी एजेन्डासहित ८ वटा एजेन्डा तय गरेको छ।
केन्द्रीय सदस्य डा.गोविन्दराज पोखरेलले ८ एजेन्डा तय भइसकेको र अब केन्द्रीय समिति बैठकमा छलफल हुने जानकारी दिए।
सभापति शेरबहादुर देउवाले पूर्णबहादुर खड्कालाई कार्यवाहक सभापति नियुक्त गरेपछि पहिलोपटक कांग्रेसको केन्द्रीय कार्यसमितिको बैठक बस्न लागेको हो।
बैठकका ८ एजेन्डा :
१. जेनजी प्रदर्शन र विकसित राजनीतिक घटनाक्रम सम्बन्धमा ।
२. पार्टीको पन्ध्रौं महाधिवेशन तयारी सम्बन्धमा ।
३. प्रतिनिधिसभा विघटन र घोषित फागुन २१ को निर्वाचन सम्बन्धमा ।
४. तोडफोड र आगजनीबाट भग्नावशेष भएका केन्द्रीय कार्यालय लगायतका मुलुकभरका विभिन्न कार्यालयहरूको पुनः निर्माण सम्बन्धमा ।
५. मुलुकको शान्ति सुरक्षा एवं सुशासनको अवस्था सम्बन्धमा ।
६. प्राकृतिक विपद् र क्षतिपूर्ति तथा पुनः निर्माण सम्बन्धमा ।
७. कार्यसम्पादन समितिको निर्णय सम्बन्धमा ।
८. विविध ।
